Qeqqa illuliassanut aningaasaliissutinik amerlanernik perusuttoq
Namminersorlutik Oqartussanit aningaasaliissutit illuliassanut pisortanut taarsigassarsiarineqarsinnaasunngortitat annikippallaartut, Qeqqata Kommunia isumaqarpoq. Minnerpaamik marloriaatinngortinneqartariaqarput, Malik Berthelsen oqarpoq.
Qeqqata Kommuniani innuttaasut Sisimiuneersut aamma Maniitsumeersut piginneqatigiilluni inissianik sanaartornissamut soqutiginnilluarput.
Namminersorlutilli Oqartussat kommuninut aningaasaliissutigisartagaat, inissialiornissamut taarsigassarsiassanngorlugit atorneqartussanngortitat ukiumut 12,4 milliuunit koruuniusut Qeqqata Kommunianut naammanngillat. Aningaasammi piginneqatigiilluni inissianut qulinik inissiaqartunut taamaallaat naammapput. Kommunip inissialiornissamut atatillugu pisortanut taarsigassarsiassatut aningaasaatai ukiumut 7,4 milliuunit koruuniusarput.
Kommunip akiliisinnaassusaa innarlerumanagu ukiup sinnerani inissialiornissamut qinnuteqartussat sinneri taarsigassarsitinnissaat itigartinneqassasut, kommunalbestyrelse maanna aalajangerpoq.
Marloriaatinngortinnissaa pisariaqarpoq
- Innuttaasut amerliartuinnartut piginneqatigiillutik inissialiornerat pitsaasutut isigigaluarlutigu, kommunip aningaasaatai tigoriaannaat illersorumallugit killiliisariaqalersimavugut, Qeqqata Kommuniani borgmesteri Malik Berthelsen tusagassiorfinnut nalunaaruteqarluni ilisimatitsivoq.
Inissialiorumallutik taarsigassarsinissamut qinnuteqartut amerlanerusut kommunip akuerisinnaassappagit, kommunimut aningaasaliissutit amerlineqartariaqarput.
- Aalajangersimasumik eqqarsaateqanngilagut. Innuttaasulli soqutiginninnerat piviusorsiortumik malissagaanni, aningaasaliissutit 12,4 milliuunit koruuniusut minnerpaamik marloriaatinngortinneqartariaqarput, Malik Berthelsen Sermitsiaq.AG oqarpoq.
Karsi matuneqarpoq
Sisimiuni piginneqatigiiffiliornissamut taarsingassarsianiartunik qinnuteqartoqareersimavoq. Maniitsumilu piginneqatigiiffiliorusuttut taarsigassarsinissamik aamma soqutiginnittoqarpoq.
- Aningaasaliissutaasut sipporlugit kommunimi aningaasaliisassagutta inatsillu malillugu
aatsaat ukiut 30-t qaangiunneranni taarsersugassangortarneri eqqarsaatigalugit,
taamatut ingerlanissaq kommunip tigoriaannarnik aningaasaataanut
ulorianartorsiortitsilissammat, kommunip karsia illersorniarlutigu killiliinissaq
avaqqussinnaanngilarput, Tassami ukiuni sisamani kingullerni piginneqatigiilluni
inissialiorniartunut katillugit 58 milliuunit koruunit taarsigassarsiaritissimavagut, Malik Berthelsen ilisimatitsivoq.
Aningaasaliissutit taarsigassarsiaritinneqarsinnaasut piginneqatigiilluni inissialiornernut, soraarnerussutisiaqartut inissiaannik aserfallatsaaliinernut aamma inissianik aaqqissuussinernut atorneqartussanngorlugit taarsigassarsiarineqartarput.