Qeqertarsuup Tunua: Qaleralinniarneq matuneqarallassaaq
Qaammammi matumani taleralittassiissutigineqartut tamakkerlugit aalisarneqarsimalerput. Kalaallit Nunaanni Aalisarsinnaanermut Akuersissutinik Nakkutilliisoqarfik nalunaaruteqarpoq Qeqertarsuup Tunuani oktoberip sinnerani qaleralinniarneq matuneqarallassasoq.
Kalaallit Nunaanni Aalisarsinnaanermut Akuersissutinik Nakkutilliisoqarfik matumuuna nalunaaruteqarpoq Qeqertarsuup Tunuani sinerissap qanittuani umiatsiaaqqamik qaleralittassiissutit qaammatikkuutaartut nungunneqalermata aalisarneq matuneqassasoq.
Qaleralinnillu tunisineq qaammatip naanissanut matuneqarallassaaq, novemberilli aallaqqaataaniit aalisaqqilertoqarsinnaassalluni.
Kalaallit Nunaanni Aalisarsinnaanermut Akuersissutinik Nakkutilliisoqarfiup tusagassiutinut nalunaarutigaa Qeqertarsuup Tunuani 47-JK-mik naaneqartumik akuersissutillit kisimik eqqorneqassasut.
- Taamaattumik sapaat ulloq 20. oktober 2019 nal. 23.59 aamma tunitsiviussaaq ulloq kingulleq ullorlu taanna aalisaatit tamarmik qaqinneqariissapput, allassimavoq.
Qeqertarsuup Tunuani qaleralittassat 10.580 tonsinut qaffassallugit Naalakkersuisut ukioq manna septemberimi aalajangerput. Taamaasilluni qaleralittassat siornarnit amerlanerulerput, siorna 9.200 tonsiugamik. Qalerallit katillugit 5.120 tonsit Qeqertarsuup Tunuani aalisarneqarsinnaasutut biologit innersuussutigisimavaat.