Qeqertarsuup Tunuani umiatsiaararsortut qaleralinniaannarsinnaapput

Qeqertarsuup Tunuani umiatsiaararsortut aalisaannarsinnaaniassammata decembarimut pisassiissutit novembarimut nuunneqarput. Uummannami angallatinik aalisartut aamma ajornartorsiorput. Naalakkersuisut tamanna ullumi misissorniarpaat.

Qeqertarsuup Tunuani umiatsiaararsortut novembarimi aalisarluarput. Tassami pisassiissutit sapaatip akunnerata naanerani kingullermi tamakkerneqangajalluinnarmata, taamaattumik Naalakkersuisut decembarimut pisassiissutit 168 tonsiusut qaammammut matumunnga nuuppaat.

Aalisartut qaammatip sinneranut qanoq amerlatigisunik pisaqarsinnaanerannik missiliuineq tonsinik qassinik nuussisoqarnissaanut tunngaviussasoq, Piniarnermut Aalisarnermullu Naalakkersuisoqarfimmi pisortap Jørgen Isak Olsenip Sermitsiaq.AG-mut ilisimatitsissutigaa.

Novembarimut pisassiissutit 253 tonsinit 421 tonsinut maanna amerlineqarput.

Aalisartut taamaalillutik qaammammi matumani aalisaannarsinnaapput, aammali Qeqertarsuup Tunuani umiatsiaararsortunut pisassiissutit decembarimut katillugit 74 tonsiulerlutik.

Det betyder, at fiskerne kan fiske videre i denne måned, men også at decembers sammenlagte kvoter for jollefiskerne i Disko er på 74 tons.

Septembarimi aalisarnerup arriinnera oktobarimi immikkut pisassiinermik kinguneqartoq

Septembarimi aalisarneq killeqarmat, pisassiissutit aalisarneqanngitsut 293 tonsiusut oktobarimut nuunneqarput, taamaalilluni pisassiisutit 500 tonsinit 793 tonsinut amerlineqarlutik.

Uummannami aalisartunut 6 meterinit annerusunik angallatilinnut aamma ilungersunartorsiortoqarpoq. Aqutsiveqarfik 47 Uummannamut, Qeqertarsuup Tunuanut aamma Upernavimmut atasoq, pingasunut immikkoortitaavoq, taamaattorli ataatsimoortumik pisassiissuteqarlutik.

Uummannami ukiumut pisassiissutit aalisarneqareerput, aqutsiveqarfimmili aalisartut suli pisarineqanngitsunik 2700 tonsinik suli pisassaqarlutik.

Aqutsiveqarfimmi 47-mi aalisartut sumiiffinni pingasuni tamani aalisarsinnaatitaapput, taamaattumillu Uummannamut pisassiissutit ilaat sumiiffinnit allanit marluusuneersunit aalisarneqarlutik.

Illoqarfik tamakkiisumik eqqugaasoq

Uummannamili aalisartut ukiup taamaalinerani pisassiissutinik Qeqertarsuup Tunuani Upernavimmilu pisarineqanngitsunik aalisariarsinnaanngillat, aalisarnerlu unittooraangat illoqarfik eqqaamiuilu tamarmik eqqugaasarlutik, taanna erseqqissaavoq.

- Aalisakkanik suliffissuit tunisineq unitsinneqaraangat sulisutik angerlartiinnartariaqartarpaat taamalu angallatini inuttat aamma isertitaaruttarlutik. Ilaqutariippassuit aningaasarsiornermikkut eqqugaapput, aalisarnerullu ingerlatiinnarnissaa pisariaqarluni tamannami ukiup taamaalinerani pisariaqartinneqartorujussuummat, borgmesteri oqarpoq.

Naalakkersuisut pineqartoq ullumi oqaluuserissagaat aaqqiissutissarsiussasullu, naalakkersuisoqarfimmi pisortaq Jørgen Isak Olsen oqarpoq.

Powered by Labrador CMS