Qeqertarsuup Tunuani raajaqassuseq SQAPK-p ernummatigingaa
Qeqertarsuup Tunuani marlunnik qalorsualerluni raajarniarnerup raajaqassuseq innarleratarsinnaagaa, sinerissap qanittuani aalisartut kattuffiani SQAPK-mi siulittaasup ernummatigaa. Tamanna Ilulissani raajarniutaatillit taperseraluaraat, Pinngortitaleriffimmi biologip ernumanissamut peqqutissaqannginnerarpaa.
Qeqertarsuup Tunuani qalorsuit marluk atorlugit raajarniarsinnaaneq 2002-mi eqqunneqarpoq. Tamatuma kingunerisaanik kilisaatit qalorsuarnik marlunnik atuisuusut, kilisaateqqaanut mikinerusunut naleqqiullugit annertoorujussuarmik pisaqartalerput. Taama oqarpoq SQAPK-p pisortaa Erik Lange. Qalorsuillu marluk atorlugit aalisarnerup raajaqassutsimut qaleraleqassutsimullu innarliisinnaanera ernumanartoqarmat, taamatut aalisarneq unitsinneqarluinnartariaqartoq, kilisaatit mikinerusut kisimik Qeqertarsuup Tunuani raajarniarsinnaatitaasariaqartut, taanna isumaqarpoq.
Aviisi Sermitsiaq taama allaaserisaqarpoq.
- Taamaaliornikkut ilaatigut sinerissap qanittuani raajartassiissutit amerlanerulersinneqarsinnaapput, tassami ataasiinnarnik qalorsualerluni aalisarneq peqassutsimut innarliinavianngilaq, taanna oqarpoq.
Raajat ikiliartornerat aalisarfiit annikittuinnaat annertoorujussuarmik aalisarfigineqalersimanerannut pissutaasoq, ukiullu 15-it matuma siorna pisarineqartartunut naleqqiullugit maanna pisarineqartartut ikinnerulersimasut, Erik Lange isumaqarpoq.
- Taamaattumik sinerissap qanittuani raajarniarneq maannakkornit sukannerusumik inatsisiliuunneqartariaqarpoq, taanna oqarpoq.
Ernumanissamut peqqutissaqanngitsoq
Qeqertarsuup Tunuani raajarniarnermi kilisaatit angisuut marluk, tamarmik marlunnik qalorsuarsorlutik raajarniartuusut, Pinngortitaleriffimmi biologi AnnDorte Burmeister, oqarpoq. Raajarniarluni aalisarnermiit nalunaarsugaat naapertorlugit, 2002-p kingorna kilisaatit marlunnik qalorsuarsortut 13-it Qeqertarsuup Tunuani raajarniartarsimapput.
- Qeqertarsuup Tunuani raajat angissusaat 1988-imiilli nikerarpoq. Ukiut kingulliit qulit ingerlaneranni raajat angissusaat nikippiarsimanngilaq. Taamaattumik Qeqertarsuup Tunuani raajarniarneq imminut illersorsinnaasumik ingerlanneqartoq, Pinngortitaleriffimmiit isumaqarpugut, AnnDorte Burmeister oqarpoq.
Allaaserisaq tamaat Sermitsiami atuaruk – uani ataani aviisimut isissutissarsigit: