hellefisk

Qeqertarsuup Tunuani qalerallit suli tatineqarput

Nunatta imartaani qalerallit amerliartorput - taamaallaat Qeqertarsuup Tunuani pinnani, ilisimatuut inassutigaat tamaani qaleralinniarneq annikillisinneqassasoq

Qeqertarsuup Tunuani qaleralinniarneq inuussutissarsiutaalluarpoq - tamannalu qalerallit amerlassusaanni malugineqarsinnaavoq

Siullermik nutaarsiassaq nuannersoq: Pinngortitaleriffiup nalunaarutigaa immap pisuussutaanik ingerlatseqatigiiffiit ICES aamma NAFO naliliisut qalerallit amerliartorlualersimasut.

Amerliartorput

Qaleqarfinni arlalinni qalerallit amerliartorput, tamannalu pissutigalugu 2017-imut pisassiissutissat amerlineqarsinnaapput. Tamatumani pineqarput Kitaata avataani qaleraleqarfik Canadamut atasoq. Tassani qaleralittassat 2.300 tonsinik amerlineqasinnaasorineqarput.

Taamatuttaaq Tunup, Islandip Savalimmiullu imartaanni qaleralittassat 2.000 tonsiniit 24.000 tonsinut amerlineqarnissaannut tunngavissaqarpoq.

Maani pisassat ikilillugit

Akerlianik Qertarsuup Tunuani qalerallit suli ikiliartortuarput. Ilisimatuut siunnersuutigaat aappaagu tamaani taamaallaat 6.400 tonsit aalisarneqassasut - 2016-imut inassuteqaammut sanilliullugu 1.600 tonsinik ikinnerusunik. 2015-imi Qeqertarsuup Tunuani qalerallit 8.674 tonsit pisarineqarsimapput.

Pisassat amerlassusissaat Naalakkersuisut aalajangertarpaat.

Powered by Labrador CMS