Qeqertarsuup Disko Line naammatsiffigaa

Attaveqarnermut naalakkersuisoq, Múte B. Egede (IA), angallanneq pillugu innuttaasunik ataatsimiititsimmat, akerliussutsimik takutitsisut 50-it missaanniittut takkuttut Qeqertarsuarmit utimullu angallannermi ajornartorsiutit kamaatigaat.

Taassuma aamma politikkikkut anguniakkat ingerlasut siunissamilu pisussat saqqummiuppai.

Innuttaasunik ataatsimiititsinermi peqataasut 70-it missaanniittut misigissutsitik aniatippaat.

Disko Linep piumasaqaaterpassuit naammassisinnaanngikkai Qeqertarsuarmiut naammagilerlugit naalakkersuisumut erseqqissaatigaat, soorlu imaatigut angalanermi isumannaannerunissamik kissaateqarneq.

Atuaruk: Angallanneq pillugu Qeqertarsuarmi ataatsimiitoqassaaq

Innuttaasunut isumaqatigiissummik unioqqutitsineq
Qaasuitsup Kommuniani kommunalbestyrelsimut ilaasortap, Kristian Brobergip (S), Naalakkersuisut aamma Disko Line sakkortuumik isornartorsiopai.

- Innuttaasut toqqissisimanngissutigisatik pillugit isornartorsiugarpassui qanoq ililluni tunuinnarneqarsinnaappat? Qeqertarsuarmi innuttaasunut tamanna asissuineruvoq. Qeqertarsuaq illoqarfittut Naalakkersuisut soqutiginngilaat, nuannersumillu nutaarsiassaqartitsineq ajorput, taanna oqarpoq.

- Disko Line kissaatigineqanngilaq. Umiarsuaateqarfiup isumaqatigiissummi piumasaqaatit malinngippagit, tamanna kinguneqartinneqartariaqarpoq, Kristian Broberg erseqqissaavoq.

Atuaruk: Disko Line-mut naammagittaalliorsinnaaneq ajornannginnerulissaaq

Siunissaq nalorninartoq
Disko Line ukiorpassuarni unammilligassaqartarsimasoq, Múte B. Egedep oqaatigaa, taassumalu maanna killiffik pitsaannginnerarpaa.

- Arlalinnik iluarinngisaqarpunga, pissutsillu iluarsineqassappata Disko Line suliassarpassuaqarpoq. Umiarsuaateqarfik ilaatigut piumasaqarfigaarput, ingerlatseqatigiiffik innuttaasunut tatigeqatigiittumik toqqissisimasumillu attaveqatigiinnermik pilersitsissasoq. Tamannalu piviusunngortinneqarnissaa Naalakkersuisut qulakkiissavarput, attaveqarnermut naalakkersuisoq oqarpoq.

Ingerlatseqatigiiffiup aamma ilaasut akornanni attaveqatigiinnermi ajornartorsiut ingerlaannaq iluarsineqarnissaa, Muté B. Egedep Ilulissani Disko Linemik ataatsimeeqateqarnermini piumasarisimavaa.

Kisianni umiarsuaateqarfiup tamanna iluarsisinnaanngippagu, umiarsuaateqarfimmut qanoq kinguneqarsinnaanera oqaatigerusunngilaa. Kisianni kiffartuussinermut isumaqatigiissutinik ajornartorsiuteqarneq sivisuallaartoq, taassuma naqissuserpaa.

- Ajornartorsiut iluarsineqanngippat, qanoq pisoqarnissaa oqaatigerusunngilara, taanna oqarpoq.

Atuaruk: Disko Line: Namminersorlutik Oqartussat talittarfiit akisussaaffigaat

Siunissami mittarfik
Múte B. Egedep aamma Disko Linemik angalatilluni misiginerlussimasani namineq oqaluttuarai, innuttaasullu iliuuseqartoqarnissaanik piumasaqarnerat paasisinnaanerarlugut. Taassuma Arctic Umiaq Line aamma oqaloqatigisimallugu ilisimatitsissutigaa.

- Sarfaq Ittuk Qeqertarsuarmut tulattalersinnaaneranik misissuinermik aallartitsisoqarpoq. Tamanna piviusunngorsinnaappat aasaaru tikittalersinnaassaaq, taannaq oqarpoq, ataatsimiigiartullu siunissami mittarfeeraqalersinnaanissaanik periarfissaqartoq toqqissisarpai.

Atuaruk: Disko Line nakkutigineqartorujussuuvoq