Qeqertarsup tunuani aalisartut aasaq tamaat aalisarsinnaapput

Aasaanerani aalisarnerup unittoornissaa pinngitsoortinniarlugu, Avannaani sinerissap qanittuani juunimi juulimilu qaleralinnut pisassiissutit Naalakkersuisut qaffappaat. Pisassiissutit ukiup naalerneranit ”atugaapput”, tassani pilersaarutit malillugit pisassiissutit siornarnisat nuunneqartussaapput.

Aasaanerata qaammataanni umiatsiaararsortunut qaleralinniarneq qulakkeerneqarpoq. Siornatigut qaammammut pisassiissutit ajornartorsiutaasarput, silagissimatillugu qaammammut pisassiissutit qaammatip aallartilaarnerani tamakkerneqaraangata aalisarnerup unitsinneqarneranik kinguneqartarmat.

Taamaammat aqutsiveqarfinni Qeqertarsuup Tunuani, Uummannami Upernavimmilu Naalakkersuisut juunimi pisassiissutit 350 tonsinik juulimilu 350 tonsinik qaffappaat, ukioq manna ajornartorsiut taanna pinngitsoorniarlugu.

Sinerissap qanittuani qaleralinniarnermut nalunaarummik nutaamik decembarimi 2020-meersumik, pisassiissutit pisarineqanngitsut angallatinut 6 meterinit anginerusunut 2020-mit ukiup sinnerani qaammatinut nuussisoqarsinnaalerpoq, taamaalilluni tassani pisassiissutit amigaataanerat ajornartorsiutaassanngimmat.

Siorna pisat naatsorsorneqarneri juulimi piareernissaat naatsorsuutigineqartoq Piniarnermut, Aalisarnermut Nunalerinermullu Naalakkersuisoqarfimmi pisortap, Jørgen Isak Olsen, Sermitsiaq.AG-mut ilisimatitsivoq.

2020-mi pisassiissutit tukattut
Siorna oktobarimi qaleralinnut pisassiissutit oktobarip 12-anni tamakkerneqarput, ukiup sinneranut pisassiissutit oktobarip 28-anni tamakkerneqareersut. Ukiullu taassuma siulianit qaammatit kingullernit nuunneqarput, silap atoruminarnera atorluarumallugu.

TAC-p katinnerannik qaffanneqaqattaarneranni, Qeqertarsuup Tunuani umiatsiaararsortunut pisassiissutit 4.968 tonsiupput.

Qeqertarsuup Tunuani TAC-p katinnera kilisaatinut umiatsiaararsortunullu 2020-mi 9.325 tonsiuvoq. Qeqertarsuup Tunuani ilisimatuussutsikkut siunnersuineq 2020-mi 5.120 tonsiuvoq.

Naalakkersuisut siulii qaleralinnut pisassiissutit ukiuni sisamani appariartuaartinnissaannut periusissiaqarput, taamaalilluni biologit siunnersuinerannut naleqqutilissammat. Siorna qaffaasoqarneranit ukiumut TAC 82 procentinik siunnersuinermit qaffasinneruvoq.

Powered by Labrador CMS