Qeqertarsuatsiaat
Qeqertarsuatsiaani piumassutsiminnik sulisut amerlisut
Inuusuttut tallimat piumassutsiminnik sulisussatut inoqatiminnillu sullissilernissaminnut Kalaallit Røde Korsiannit Qeqertarsuatsiiani sungiusarneqarput
Kalaallit Røde Korsiata suliniut Inua aqqutigalugu piumassutsiminnik sulisussatut inoqatiminnillu sullissilernissaminnut piumassusilinnut tarnikkut ikiueqqaarnermik Qeqertarsuatsiaani oktobarip qaammataani pikkorissaavoq.
Inuusuttut tallimaat piumassutsiminnik sulisussatut inoqatiminnillu sullissilernissaminnut sungiusarneqareersullu, Qeqertarsuatsiaani piumassutsiminnik sulisut amerlipput.
Katillutik eqimattami inuusuttunnguit 14-ngorput ,nunaqarfimminni ineriartortitsinissamut meeqqanik inuusuttunillu sammisassaqartitsisalernissaminnut annertuumik pilersitserusussuseqarlutillu sullisserusussusilinnik. Suliniummi Inuami siunertaavoq nuannersumik sammisassaqartitsinikkut inuusuttut ataatsimoortilernissaat, inuusuttunik nukittorsaanerup saniatigut sakkussaannik inuunerminni naapikkumaakkaminnut iluaqutigisinnaasaannik tuniorarnerisigut, Kalaallit Røde Korsiat allappoq.
- Qeqertarsuatsiaani kajuminneq najoqqutaralugu sammisassaqartitsiviit assut ingerlalluarput. Kajumillutik sulisut assut pimoorussinermik saniatigut akisussaafferujussuarmik tigusisimapput Assorsuaq tulluusimaarutigaagut. Assorsuaq nuannaarutigaarput ,kajumillutik sulisut sammisassaqartitsivinnik atuisunut kaammattuiinnaratik saniatigut kajumilluni sulisarnermik annertuumik soqutiginnilersitsisinnaasimammata, inuusuttunut siunnersorti Elisa Leth oqarpoq.
Atuaruk: Inuusuttut piumassutsiminnik sulisartussat ilinniartinneqartut
Qeqertarsuatsiaani inuusuttut piumassutsiminnik sullissisunit 14-init aqqaneq-marluk ilinniagaqaqqipput. Taakkua nalunaaquttap akunnerini arfinillinni tarnikkut ikiueqqaarnermik ilinniartinneqarput oqaloqateqariaatsinik, eqeersimaartumik tusarnaarneq, ajornartorsiutit naapissinnaasat kiisalu qisuariaataasinnaasut suusinnaanerinik pikkorissaavigineqarlutik.
- Inuusuttunnguit tigusilluaqaat soqutiginneqalutillu oqaatigivaattaaq meeqqanik inuusuttunillu sullissinerminni sakkugilluarsinnaajumaaritik ilisimmaarilikkatillu iluaqutigilerumaaritik unnerlutik nalaataannik suugaluanik sullinniarnerini qulaqqutiginngilaat iluaqutigillualerumaarlugit, Kalaallit Røde Korsiat allappoq.
Inuusuttut nammineq piumassutsiminnik sulisut taamaalillutik ilinniakkamik naammassinnipput piginnaanngorsagaallutillu meeqqanik inuusuttunillu oqimaatsumik nalaataqarsimasunik nalaassissagaluarunik, oqaloqatiginninnernik ajornakusoortunik ingerlatsisinnaanngorlutik.