Sermersooq
Qeqertarsuatsiaani paasissutissiilluni ataatsimiititsineq
Nunaqarfimmi paasissutissiilluni innuttaasunik ataatsimiititsinermi sanaartornermut pilersaarutit IBA-millu isumaqatigiissutip iluaqutissartai paasissutissiissutigineqarput
Tallimanngormat ualikkut naalagaaffeqatigiit siuttuisa Qeqertarsuatsiaanut tikinnginneranni borgmester Asii Chemnitz Narup (IA) nunaqarfimmilu siulersuisut siulittaasuat Jonathan Jacobsen, nunaqarfimmi pissutsit pillugit innuttaasunik paasissutissiillutik ataatsimiititsipput.
Taamatut Kommuneqarfik Sermersooq tusagassiorfinnut nalunaarutikkut paasissutissiivoq.
Sanaartornermik suliniutit pingasut
Kommuneqarfik Sermersuup Qeqertarsuatsiaani sanaartugassatut pilersaarutai anginerit pingasut Asii Chemnitz Narupip oqaluttuarai. Atuarfiup eqaarsaartarfia allineqassaaq, garagemik nutaamik sanasoqassaaq kommunillu allaffia annertuumik nutarterneqarlunilu allineqassaaq.
– Kommuneqarfik Sermersuup nunaqarfiini tamani sanaartorniarneq unammilligassaasarpoq. Kommunip anguniarpaa suliniutit ukioq manna aallartissinnaassasut, aappaagulu naammassineqarlutik, borgmester Asii Chemnitz Narup oqarpoq.
Qeqertarsuatsiaani 2016-imi sanaartornissamut katillugit 11,5 millioner koruunit immikkoortinneqarsimapput. Aningaasaliissutit Kommuneqarfik Sermersuup periusaanut naapertuupput, tassa suliniutit nunaqarfiit ataasiakkaarlugit ataatsikkut ingerlanneqartassasut, taamaasilluni aningaasat pitsaanerpaamik atorneqassammata.
IBA-mik isumaqatigiissut
Paasissutissiilluni ataatsimiititsinermi aamma IBA-mik (Impact Benefit Agreement) isumaqatigiissutip, True North Gems Greenlandip (TNGG), Kommuneqarfik Sermersuup aamma Namminersorlutik Oqartussat siorna isumaqatigiissutigisaasa, nunaqarfimmut iluaqutissartai oqaluttuarineqarput.
– IBA-mik isumaqatigiissut isumaqatigiissutaavoq pitsaasoq, taannalu aamma TNGG-mit ataqqineqarlunilu malinneqarpoq, tassuunakkullu qulakkeerneqarpoq kalaallinik sulisoqarnissaq aammalu piiaaffik inooqatigiinnikkut, aningaasarsiornikkut avatangiisitigullu atasinnaasumik. Ataqatigiissaarinermut gruppi akuttunngitsumik ataatsimiittarpoq - ilaatigut isumqatigiissut malikkipput immitsinnut eqqaasittarluta, borgmester Asii Chemnitz Narup oqarpoq.
Ineriartorneq nangillugu
Nunaqarfimmi siulersuisut sinnerlugit siulersuisut siulittaasuat Jonathan Jacobsen peqataavoq. Nunaqarfimmi pissutsinut apeqqutit akissuteqarfigisarpai, siulersuisullu sulilluarnerat pillugu nersualaarneqarpoq.
– Nunaqarfiup siulersuisui politikkimik sulinermik misilittagaqarluarput piumassuseqarluartorujussuullutillu. Nunaqarfimmik ineriartuinnarnissaanik pisariaqartitaanillu, pingaarutilinnik pisariaqartunillu eqqarsaatersortarput. Taamatut suleqatigiinneq nuanneqaaq, borgmester Asii Chemnitz Narup oqarpoq.
Ataasinngorpat maajip 9-anni nunaqarfik Kapisillit borgmester Asii Chemnitz Narupimit tikeraarneqassaaq.