Qeqertarsuaq Kangerlullu Avannaata Qimussersuanit peqataasinnaajunnaartinneqavittut
Qeqertarsuaq Kangerlullu qimussernerni allani peqataasinnaanerannik mattussaaqqaannartussanngorput, sumiiffinni qimmit qimuttut DNA-visa misissorneqarnissaasa tungaannut.
Qeqertarsuarmi qimmip ataatsip qimmimit qimuttuunngitsumit akusaasimanera, Qeqertarsuarmi Kangerlummilu qimussertartunut suli kingunerluuteqartuarsinnarpoq.
KNQK, Kalaallit Nunaanni Qimussertartut Kattuffiata, qimussit Qeqertarsuarneersut Kangerlummeersullu unamminernut allanut peqataasinnaanerannit mattussinertik attatiinnarpaat.
- Siulersuisuunerit peqataasut tamakkerlutik aalajangiusimavaat Qeqertarsuarmi Kangerlummilu qimmit Unammersuarnermut mattussimaneqarnerisa atortiinnarneqarnissaat, oqartussaasut qanoq iliuuseqaqqaartinnagit. Qimmeq qimuttup akuneqarnissamit illersungaanera tunngavigineqarpoq, KNQK allappoq.
Qimmeq qimuttoq Qeqertarsuarmiittoq januarimi 2018-imi paasineqarpoq qimmimik qimuttuunngitsumik akusaasoq. Qimmip DNA-vata misissorneqarnerani paasinarsivoq qimmeq 50 procentimik qimmiusoq qimuttoq, 50 procenterli sinneruttoq allanertamit qimmimeersoq. Qimmeq oktoberimi 2018 toqunneqarpoq, piginnittup piumasaqarnera aallaavigalugu.
Qimmit innarlerneqarsinnaapput
Tamannali KNQK-mit naammagineqanngilaq.
Qimmeq Projekt, qimmit DNA-vinik misissuisimasoq, KNQK-mut ilisimatitsisimavoq qimmit qimuttut akusat nunatsinnut tulluussarsimanerat innarlersinnaasoq, KNQK ilisimatitsivoq.
Kattuffiup kissaatiginngilaa qimmit qimuttut allat qimminit allanertanit akuneqarsimasinnaasunit, akuneqarnissaat.
Qimmeq akusaq sanngiillisinnaavoq:
- Qimmip nukiinut innarliissutaasinnaavoq
- Qimmip issimut akiuussinaanerannut innarliissutaasinnaasoq
- DNA akusaq piaqqinermit annikilliartorsinnaavoq, katavinnanilu
Inatsisartuni oqaluuserineqassaaq
Uumasut nakorsaata suliami ilisimatitsissutigaa, inatsisit atuuttut malillugit uumasunut nakorsaq suliami suliaqaqqissinnaanngitsoq.
Allatulli pisoqarsinnaagunarpoq.
Inatsisartut ukiukkut ataatsimiinnerminni oqaluuserissavaat ilumut Naalakkersuisut peqquneqassanersut, Qeqertarsuarmi qimmit qimuttut 2017-ip kingorna piaqqiaasut tamarmik DNA-kkut misissuiffigeqqussanerlugit. DNA-kkut misissuinerup takutissavaa qimminik akusaqalersimanersoq.
Aalajangiiffigisassatut siunnersuut Inatsisartuni 24. februar 2021 oqaluuserineqassaaq.
Siunnersuut naapertorlugu, qimmit qimuttut Qeqertarsuarmiittut 2017-imiit 2019-imut piaqqiorlutik kinguaassiorsimasut tamarmik 160 missaanniipput. Misissuinissaq ingerlanneqassappat aningaasartuutigissamaakkat katillugit 320.000-400.000 kr. missaannissaapput.