Qeqertalimmi isumaqatigiissut piariilersoq
Ane Hansen Kommune Qeqertalimmi borgmesteritut ingerlaqqittussanngorpoq. Taassuma kommunimi ukiuni sisamani tullerni politikkikkut siammasissumik suleqatigiinnisaq angorusuppaa.
Kommune Qeqertalimmi kommunalbestyrelsep isumaqatigiissutissaat piareerluinnalerpoq. Inissititigassat mikisualuit kisimik naammassineqartussaasut, Ane Hansen ilisimatitsivoq, naatsorsuutigilluinnarpaalu siammasissumik suleqatigiinneq anguneqarsinnaasoq.
- Isumaqatigiissut naammassilluinnalerpoq, naatsorsuutigaaralu inissititerluni ataatsimiinnermi sioqqutitsiarluguluunniit atsiorneqarumaartoq. IA-mit suleqateqarnissaq toqqarparput, siammasissumillu suleqatigiinnissaq angorusullugu, Ane Hansen oqarpoq. Taanna kommunimi borgmesteritut ingerlaqqittussanngorpoq.
Suleqatigiinnissaq kissaatigineqarpoq
Ane Hansen qinersinermi Peter P. Olsenimit taasisutigut qaangerneqaraluarpoq. Taannali naalakkersuisunngussaaq, taamaasilluni Ane Hansen borgmesteriuinnassalluni.
Kommuni qinersisartut 50 procentii sinnerlugit IA-mik taasisimapput. Kommunalbestyrelse 15-inik ilaasortaatitaqartussaq, taakkunannga qulingiluat IA-meersuupput, Atassut Demokraatillu tamarmik ataatsimik ilaasortaatitaqalersut kiisalu Siumut sisamanik ilaasortaatitaqartoq.
- Partiit allat peqataatinneqarnissaat qulakkeerusupparput. Suleqataarusunneruvugut, oqartussaaqataanermillu ingerlatserusunnerulluta kisitta sulinissatsinninngaanniit, Ane Hansen oqarpoq.
Kommunip ilusaa inerisarneqaqqissaaq
Kommune Qeqertalik kommuninngoramili namminerisamik sullissinermut aaqqissuussisimavoq ilusilersuilluni. Taamaasilluni qitiusoqarfiup akuersinissaa utaqqinagu illoqarfigisami kommunip allattoqarfia innuttaasunut qanimut sullissilluni aalajangiisinnaassuseqartinneqarpoq.
Tamanna kommunalbestyrelsep inerisaqqissaavaa, qitiusumik ingerlatsivik qulaaniit aqutsisuutinnagu siunnersuisutut tapersersuisutullu inissisimanerulertittussanngorlugu.
- Taassuma saniatigut meeqqat inuusuttullu atugaasa pitsaanerulernissaat isumaqatigiissutigaagut, soorlu atuarfeqarfinni, sunngiffimmi sammisassani aammalu peqqinnerulernissamut tunngatillugu. Kiisalu inunnik isumaginnittoqarfimmi suliani suliniutinik ingerlatitseqqiissalluta, Ane Hansen oqarpoq, taassuma erseqqissarpaa taamatulli utoqqarnut inunnullu innarluutilinnut suliniutit ingerlateqqinneqassasut.
Inuussutissarsiorneq inerisarneqassooq
Kommunip inuussutissarsiorfittut piukkunnarsarnissaa kommunalbestyrelsep aamma sulissutigissavaa. Taamatullu kommunini suliffiit pilerinarsarneqaqqissallutik.
Kommunimi inuussutissarsiornerup inerisarnissaanut Qeqertalik Business Council aamma Destination Disko Bay qanimut suleqatigineqassasoq, borgmesterissaq oqaluttuarpoq.
Kommunalbestyrelsep inissititertumik ataatsimiinnissaa suli ullulerneqanngilaq.