Qeqertalik: Sanaartorneq angallannerlu ataatsimiinnermi sammineqartut
Kommune Qeqertalimmi siunissaanut pilersaarutit ataatsimiissutigineqarput
Naalakkersuit siulittaasuat Kim Kielsen kiisalu Ineqarnermut attaveqaqatigiinnermullu Naalakkersuisoq Karl Frederik Danielsen Aasiannut Qasigiannguanullu angalanerat iluatsillugu, Kommune Qeqertalimmi borgmester Ane Hansenip ataatsimeeqatigai.
- Ataatsimeeqatigiinneq paaseqatigiiffiusumik siunissamullu isigisumik ingerlanneqarpoq. Apeqqutit sanaartornermut, angallannermut kommunillu aaqqissuussaaneranut tunngasut annerusumik sammineqarlutik, kommuni tusagassiutinut nalunaarummi allappoq.
Naalakkersuisut borgmesterillu ataatsimiinneranni apeqqutit sanaartugassanut annertuunut tunngasut, soorlu kommunip iluani erngup nukinga atorlugu nukissiorfimmik kiisalu sumiiffinni assigiinngitsuni mittarfinnik sanaartornissaq minnerunngitsumillu ininik aserfallassimasunik isatereriarluni nutaanik sanaartornissaq qaqinneqarput.
- Nuannaarutigaara Naalakkersuisut kommunip aaqqissuussaanerata nutaap iluani anguniakkanut paasinnillutik oqariartornerat, sanaartugassanullu allanullumi pilersaarutinut ammallutik suleqataarususseqarnermik oqariartornerat, Ane Hansen oqarpoq.