Qeqertalik: Qimmeqarneq pillugu ileqqoreqqusaq tamanut pingaaruteqarpoq
Kommuni Qeqertalimmi qimmeqarneq pillugu ileqqoreqqusassatut siunnersuut maannakkorpiaq tusarniaassutigineqarpoq. Qaasuitsup Kommunia 2017-imi avinneqarmalli kommunimi qimmeqarneq pillugu ileqqoreqqusaqarsimanngilaq.
Qimmeqarneq pillugu ileqqoreqqusaqarnikkut kommunimi qimmit pitsaasumik atugaqartinneqarnissaat qulakkeerneqassaaq, taamaammat Kommune Qeqertalimmi innuttaasut soqutiginnittullu kommunip qimmeqarneq pillugu ileqqoreqqusassaq tusarniaassutigisaa isummerfigissavaat.
- Qimmit illoqarfimmi sumiitinneqassappat? Akiuussutissalerneqarsimappat? Ilisarisinnaaniarlugit qungasequteqartinneqassappat? Apeqqutit taakku illoqarfinni nunaqarfinnilu innuttaasunut pingaaruteqarluinnartuupput. Taamaammat qimmeqarneq pillugu ileqqoreqqusaqarnissaq pingaaruteqarluinnarpoq, Inoqarfinnut ataatsimiititaliami siulittaasup tullia Bia A. Broberg (IA) oqarpoq.
Taassuma saniatigut innuttaasut qimmeqarusuttut erseqqinnerusumik tunngaveqarluni piumasaqarfigineqarsinnaalissapput, tamannalu ulluinnarni sulianik suliaqartarnerinut iluaqutaassaaq, Kommuni Qeqertalimmit ilisimatitsissutigineqarpoq.
Qimmeqarneq pillugu ileqqoeqqusassatut siunnersuut tusarniaassutigineqartoq takuuk. Kingusinnerpaamik tusarniaanermut akissuteqarnissamut piffissaliunneqarsimavoq ulloq 12. november 2021.
Kingunerluuteqarsinnaasut
Avannaata Qimussersuanut peqataaniaraanni qimmit tamarmik akiuussutissalerneqarsimanissaat piumasaqaataavoq. Tamatuma aamma takutippaa, qimmeqarneq pillugu ileqqoreqqusanik malinninnissap qanoq pingaaruteqartiginera, Bia A. Broberg erseqqissaavoq.
- Aasianni qimmiutillit arlallit Avannaata Qimussersuanut peqataasinnaasimanngillat, qimmit akiuussutissalerneqarsimannginnerat pissutigalugu. Taamaammat qimussimik sukkaniuttoqarneranut peqataarusukkaanni ileqqoreqqusaq misissorneqartariaqarpoq, Kommuni Qeqertalimmi Inoqarfinnut ataatsimiititaliami siulittaasup tullia oqarpoq.
Bia A. Brobergip oqaatigaa, Qaasuitsup Kommuniata qimmeqarneq pillugu ileqqoreqqusaa Kommuni Qeqertarlimmut maannamuugallartoq atuussimasoq.
- Innuttaasut ataasiakkaat aasakkut qimmitik perlilersissinnaasarpaat. Tamaasali ataatsimut isigalugit isumaqarpunga, amerlanerpaat qimmeqarneq pillugu ileqqoreqqusamik malinnitarftut. Qimmeqarneq pillugu ileqqoreqqusaq qimmiutilinnut aammali najugaqarfimmut pingaaruteqarpoq, Bia A. Broberg oqarpoq.
Innuttaasut, suliffeqarfiit paaqqinnittarfiillu aamma allat tusarniaanermut akissutitik plan@qeqertalik aqqutigalugu nassiussinnaavaat imaluunniit akissutitik najukkami Sullissivimmut tunniullugilluunniit kommunimut nassiussinnaavaat.