Qeqertalik: Kisitseqqissaarnermi Nikkulaap Otto qaangerpaa
Kommune Qeqertalimmi qinersinerup kingorna kisitseqqissaarnermi kommunalbestyrelsemi ilaasortat akornanni nikeriartoqarpoq. Otto ilaasortanngornani Nikkulaat iserpoq.
Nikkulaat Jeremiassen, S, Kommune Qeqertalimmi kommunalbestyrelsemi ilaasortanngorpoq.
Qinersinerup unnukkuani paasinarsigaluarpoq Kangaatsiameersoq Otto Jeremiassen aamma Niaqornaarsunneersoq Nikkulaat Jeremiassen tamatmik 81-inik taaneqarsimasut. Taamaammat makitsisoqarpoq, Otto Jeremiassenilu makitaagami Siumut sinnerlugu kommunalbestyrelsemi ilaasortat sisamarilerpaat.
Taasinernilli kisitseqqissaarnerit maanna ingerlasut allatut inissitsitsipput. Nikkulaat Jeremiassenimi taaneqarnerulaarsimasoq paasinarsivoq.
- Tamatuma kingorna qinersivinni taaguiviit allattoqarfik INUA-nut nassiunneqarnerisa kingorna kisitseqqissaarnermi paasinarsivoq qinersivimmi ataatsimi taaguiviit marluk atortussaanngitsutut inissinneqarsimasut, pissutigalugu taaguivimmi krydsiligassami marlunnik krydsiliisoqarsimammat; partiimut aamma qinigassanngortittumut. Inatsit malillugu taasineq inummut qinigassanngortittumut taasineq inissinneqartussaaq, Kommune Qeqertalik ilisimatitsivoq.
Pineqartoq: Naatsorsuutigisimava
Taasineq nassaarineqartoq Nikkulaat Jeremiassenimut taasinerusoq pissutigalugu kommunalbestyrelsemi ilaasortat allanngorput. Nikkulaat Jeremiassenip Otto Jeremiassen taasinikkut qaangerpaa.
Pineqartup pisut eqqissisimasumik tiguai:
- Tusaqqaarakku soorunami tupaallappunga. Kisianni qinersiviup unnukkuani kisitsisit allanngoriataarneri pillugit ippigisaqarnikuungama, taama pisoqaratarsinnaaneranut sillimasimavunga, Nikkulaat Jeremiassen Sermitsiaq.AG-mut oqarpoq.
Taasinerup tullia nassaarineqartoq Arnánguak Jerimiassen, Atassummut taasinerup kinguneranik taasineri 56-iniit 57-inut nikipput.
Kommune Qeqertalimmi kommunalbestyrelse inissititerluni 3. maj ataatsimiissaaq. Kommunep attaveqatigiinnermut immikkoortortaqarfia ilisimatitsivoq kisitseqqissaarneq suli ingerlasoq.
Uku qinerneqarput:
- Ane Hansen, IA
- Kristian Jeremiassen, IA
- Klaus Lundblad, IA
- Hans Aronsen, IA
- Karl Thue Nathanielsen, IA
- Niels Kristensen, IA
- Mariane S. Larsen, IA
- Frantz Lundblad, IA
- Bia A. Broberg, IA
- Aqqa Samuelsen, S
- Ole I. Frederiksen, S
- Enok Sandgreen, S
- Nikkulaat Jeremiassen, S
- Simigaq Heilmann, D
- Naja Kristensen, A