Qeqertalik: IA-p Siumumik suleqateqarnini taamaatippaa
Kommune Qeqertalimmi Inuit Ataqatigiit aamma Siumup suleqatigiinnerat taamaatippoq.
Kommune Qeqertalimmi Inuit Ataqatigiit aamma Siumup suleqatigiinnerat pingasunngormat ajalusoorpoq, Inuit Ataqatigiillu maanna Atassutip suleqatiginissaannut isumaqatiginninniarnernik aallartitsivoq.
Kommunalbestyrelsimi ilaasortat Hans Aronsenip (IA) aamma Kristian Brobergip (S) Sermitsiaq.AG-mut tamanna uppernarsarpaat.
Partiit taakku marluk kommunalbestyrelsimi suleqatigiinnertik Siumup apeqqusersimagaa, suleqatigiikkunnaarnissamullu sioorasaarisimasut, Hans Aronsen oqarpoq.
Suleqatigiinneq ilungersunartoq
- Siumut allaffigaarput suleqatigiinnerput taamaatittoq, tamatumalu kingorna Atassummut isumaqatiginninniarnerit aallartillugit. Suleqatigiinniarnerput ilungersunartoq Siumut nalunaaruteqarpoq. Nalunaarutaat tusaatissatut tiguarput, taakkulu suleqatiginissaannut tunngavissaqarunnaartoq nalilerparput. Taamaattumik Siumut suleqatigiunnaarparput, Hans Aronsen oqaluttuarpoq.
Kommune Qeqertalimmi Siumumit ilaasortat siulittaasuat, Kristian Broberg, Sermitsiaq.AG-p oqaloqatigaa.
- Suleqatigiinnerput pillugu apeqqusiisariaqalersimavugut, tassami suleqatigiinnitsinnut tunngatillugu arlalitsigut isornartoqartipparput. Attaveqatigiittoqanngilaq, IA attavigiuminaappoq. Ukiut marluk matuma siorna isumaqatigiissuterput malillugu sulisoqanngilaq. Kisianni isornartorsiorluta aperigatta IA qanoq piva? Oqariartuuterput tusaatissatut tiguaat, suleqatigiinnerpullu taamaatilugu. Naapeqatigiinniartoqanngilaq, taamatut pisoqarsinnaanngilaq, Kristian Broberg isornartorsiuivoq.
Missingersuutini assigiinngisitsineq
Missingersuutini aamma annertuumik assigiinngittoqartoq, Kristian Broberg oqaluttuarpoq.
- Illoqarfinnut assigiinngitsunut aningaasat agguaanneqartut assigiinngitsorujussuummata missingersuut itigartitsissutigaarput. Assersuutigalugu Qeqertarsuaq katillugu 1,6 millionit koruuninnappoq, Aasiaat 85 millionit koruuninnattoq. Tamanna akuersaarneqarsinnaanngilluinnarpoq. Maanna kommunalbestyrelsimi illuatungiliuttunngornerput akueriinnarsinnaavarput, Kristian Broberg oqarpoq.