Qeqertalik: Demokraatit suleqatigiinnermit tunuartut

Demokraatit kommunalbestyrelsimi ilaasortaatitatuaat partiinik allanik suleqateqarnermit tunuarpoq, tassani Demokraatit suleriaasiat IA-mit apeqquserneqarsimanera pissutigalugu.

Demokraatit Kommuni Qeqertaliup kommunalbestyrelsiani teknikkikkut suleqatigiinnermut peqataajumajunnaarput. Simigaq Heilmann (D) Kommuni Qeqertalimmi partii Demokraatit sinnerlugit kisiartaalluni kommunalbestyrelsimi ilaasortaavoq.

Peqatigitillugu Inuit Ataqatigiit sakkortuumik isornartorsiorpai, Demokraatillu kommunalbestyrelsimi suleriaasiannik apeqqusiisimanerarlugit.

- Inuit Ataqatigiit Siumumik oqaloqateqartarninnik apeqqusiinerat naammagilerpara. Kiffaanngissuseqarlunga sulisinnaaninnut akuliuttarnerat naammagilerpara, Simigaq Heilmann tusagassiorfinnut nalunaaruteqarnermini tunngavilersuivoq.

Innuttaasut salliusutinneqartut

Kommuni Qeqertaliup kommunalbestyrelsiani Inuit Ataqatigiit amerlanerussuteqarluarput, ilaasortaasunit 15-iusunit katillugit qulingiluanik ilaasortaatitaqaramik. Demokraatit ataatsimikt, Atassut ataatsimik Siumullu sisamanik ilaasortaatitaqarlutik.

Simigaq Heilmannip nassuiaatigaa, innuttaasut pillugit sullissilluni politikkerinillu partiinut sorlernulluunniit attuumassuteqaraluartunik suleqateqarsinnaalluni.

Teknikkikkut suleqataajunnaaraluarluni kommunalbestyrelsimi sulinini ingerlatiinnarniarpaa.

- Innuttaasut ajunngitsumik atugaqarnissaat sulissutigivara, partiillu sorliugaluarpataluunniit suleqatigineqarsinnaanerat takusinnaavara. Innuttaasut ajunnginnerpaamik atugaqarnissaat anguniarlugu siammasissumik suleqatigiinnissaq pingaaruteqarpoq. Imaanngilarmi Inuit Ataqatigiit kisiisa oqaloqatigisassagikka, taanna oqarpoq.

Partiit sisamaasut tamarmik suleqatigiinnissamik isumaqatigiissuteqarsimapput. Demokraatit taamaammat partiitut kisiartaallutik teknikkikkut suleqatigiinnerup avataaniilerput.

Powered by Labrador CMS