Qatserisartut nunami ikuallanneq qamisarpaat
Ulluni amerlasuuni siallersimannginnerata seqinnarissimaneratalu nuna ikuallariaannanngortissimavaa, politiillu ikumatitsisoqarnissamut maanna mianersoqqusipput.
Sisimiuni qatserisartut maanna pinngortitami ikuallanneq akiorniarpaat. Ikuallanneq qamisarneqarpoq siaruaakkiartorunnaarlunilu, Kalaallit Nunaanni Politiit ilisimatitsipput.
Pujoorivik ikuallatsitsilersimasutut nalilerneqarpoq.
Pujoorivik nakkutigineqartoq
- Pujoorivik nakkutigineqaraluartoq ikuallannerlu qamisarneqaraluartoq, nunap panernera pissutigalugu inneq sukkasuumik siaruaassimavoq, qamisarneqarsinnaasimanngimmallu qatserisartut aggersarneqartariaqarsimapput, Kalaallit Nunaanni Politiit tusagassiuutinut nalunaarummi taama ilisimatitsipput.
Nunami ikumatitsisoqassappat mianersoqqissaarnissaq oqartussaniit maanna kaammattuutigineqarpoq.
- Piffissami kingullermi silagissimaqaaq, tamannalu Kalaallit Nunaat tamakkingajallugu pinngortitami malugineqarsinnaavoq. Nuna assut panerpoq, tamanna ikumatitanik, cigaritsinik, pujoorivinnik primusinik assigisaannillu ikumatitsinerit nunamut siaruaannissaanut navianassusaa annertunerulersippaa, politiit mianersoqqusipput.
