"Qatanngutigiit" arfinillit kinguaassiutitigut kannguttaatsuliortarneq akiorniaraat

Maligassiuisut arfinillit oqaluttuaat oqitsuinnaanngillat, taakku suliniummi Killiliisami oqaluttuassatik oqaluttuaralugit saqqummerput. Siunissamilu ikinnerusut taakku misigisimasaattut annernartigisumik misigisaqaqqunagit, alloriaqqissallutik piareerput.

Suliniut Killiliisa qaammatit sisamat matuma siornali aallartinneqarmalli, allanngortoqarsimasoq malugisinnaavaat.

- Maligassiuisutut saqqummernitta kingornali arlalinnit saaffigineqareerpunga.

- Inuit ilaatigut allattarput kinguaassiutitigut kannguttaatsuliornerit unitsinneqarsinnaanerannut neriuuteqalersimallutik, aammalu atornerlunneqareernerup kingorna inuuneqartoq takusinnaalersimallugu. Illoqarfimmi aqqusinermi naapitannit eqitaarneqariasaartarpunga, inuillu nalusamma qungujuttarpaannga ima oqarniartutut illutik “assigiimmik aqqusaangaqarpugut”. Qamuuna kissalaarnermik tunisiuarpoq, Heidi Møller Isaksen oqaluttuarpoq.

Taassuma panini kinguaassiutitigut ajorluinnartumik sakkortungaatsiartumillu kannguttaatsuliorfigineqarsimaneri anaanatut misigisimavai.

- Misigisat annerpaat ilagat inuit nalusaqqinnaamma illoqarfinni pisutsillunga naapillunga tuikkut pattalaaraangannga oqarlutillu: Qanoq iliornerit torrassuuvoq. Nukittoqaatit, eqqumiitsuliortoq Gukki Nuka oqaluttuarpoq.

Taanna 14-inik ukioqarluni arsaannermik sungiusaasuminit kinguaassiutitigut kannguttaatsuliorfigineqarluni atornerlunneqarsimavoq. Tamassuma siuliatigut sungiusaasup pineqartup ukiuni arlalinni tarnikkut kannguttaatsuliorluni atornerluttareersimavaa. Gukki Nukap atornerlungaasimanini pillugu eqqumiitsulianik “Revner i Sjælen”-imik taasaminik saqqummersitsinermini oqaluttuaqqaarpoq. Eqqumiitsuliai ukiut marluk matuma siorna saqqummersinneqaqqaarput.

Piffissami sivikitsuinnarmi allanngortoqarnera malunnartoq

Kinguaassiutitigut kannguttaatsuliortoqarsimaneranik saqqummernertik pillugu, Gukki Nuka Heidi Møller Isaksenilu saaffigineqartuaannalersimapput.

- Taakku arlallit oqaluttuarput kinguaassiutitigut kannguttaatsuliorfigineqarsimanertik pillugu arlaannaanulluunniit siornatigut oqaluttuarsimanatik, Heidi Møller Isaksen oqaluttuarpoq.

- Maligassiuisutut sassarnerput ima pingaaruteqartigisoq malugilluarsinnaavara, allaat inuiaqatigiinni kannguttaatsuliortoqarsimaneranik oqaluttuarnissaq kanngunarunnaarsimasoq, naak annernaraluarluni. Tamanna alloriarnertut annertuutut isigaara.

Gukki Nuka facebookikkut messengerikkulluunniit ullormut pingasoriarluni sisamariarluniluunniit saaffigineqartarluni oqaluttuarpoq.

- Piffissami sivikitsumi susoqangaatsiarnera annertuvoq. Sassarama oqarpunga imminut akilersinnaalluartoq, inuk ataasiinnarluunniit annaanneqassappat. Sassarama isumaqarsimanngilanga sassarnerma qanoq sunniuteqartiginera takusinnaajumaarlugu, oqarpoq.

Suliaq maanna aallartilluarpoq

Taama pisoqarnera tassumunnga maligassiuisunullu tallimaasunut sinneruttunut, kinguaassiutitigut kannguttaatsuliornerit ikilisarnissaannut suliaqarnissaminnut nukissanik tunisivoq. Isumaginninnermut aqutsisoqarfiup aaqqissugaanik Nuummi sapaatit akunneri marluk qaangiupput suleqatigiinnissaq pillugu naapeqatigiikkamik.

- Paquminartuujunnaartipparput, sulinerpullu ingerlatiinnartariaqarparput. Suliniut Killiliisa ingerlanerani, maligassiuisutut pisussaaffipput pillugu akisussaaffimmik tigumminnerusuppugut, Heidi Møller Isaksen oqarpoq.

- Inuit qanoq amerlatigisut sinnerlugit sassarnerput malugisinnaallugu nuannerpoq. Tamatta assigiinngitsunik nukittoquteqarlutalu piginnaasaqarpugut, assigiinngitsunillu misigisaqarsimalluta. Taamaakkaluartoq atalluinnartuuvugut, ammasumillu sunik tamanik oqaloqatigiissinnaalluta, Gukki Nuka ilanngussivoq.

Assigiinngissuseq nukittoqutaavoq

Siammasinneq assigiinngissuserlu sulinermi maanna atorluarneqartussanngorput.

- Suleqatigiinnissaq pillugu naapinnermi eqqartorparput nukittoqutigut assigiinngitsut sulinitsinni atorluarniarlugit. Uanga sinerissami angalassaanga saqqummiisarlungalu, taamaasillunga inuit uattut misigisaqarsimasut naapissinnaaniassagakkit. Naatsumik oqaatigalugu misilittakkakka oqaluttuarissavakka, allat uattut misigisaqarsimasut qanoq iliorsinnaanissaminnik takorluiisinnaalernissaat anguniarlugu, Heidi Møller Isaksen oqarpoq.

- Tamanna piviusunngulereerpoq. Avannaata Kommuniata Qaanaamut januaarimi qaaqquaanga. Qilanaarpunga.

Gukki Nuka sinerissami aamma angalarusuppoq, oqariartuutinili pingaarnertut eqqumiitsuliornermini saqqummiuttarumavai.

- Kinguaassiutitigut kannguttaatsuliornerit unitsinniarlugit kikkut tamarmik akisussaaffeqartut paasineqarnissaa pingaaruteqarpoq.

Soorlu qatanngutigiit

Isumaginninnermut aqutsisoqarfiup suliniut pingaaruteqarluinnartut suliarigaa, marluullutik naqissuserpaat. Maligassiuisullu ikiorneqarnissaat tapersersorneqarnissaallu Isumaginninnermut aqutsisoqarfiup isumagigaa aamma ilanngullugu. Taamaammat pisariaqartitsinikkut tarnip pissusaanik ilisimasalimmik oqaloqateqarsinnaatitaapput.

- Paarilluarpaatigut, Heidi Møller Isaksen Gukki Nukalu assigiimmik oqarput.

Taassuma saniatigut maligassiuisut imminnut tapersersoqatigiipput.

- Malugisarpara akornatsinni immitsinnut paaseqatigiinnerusinnaasugut immitsinnullu asasugut. Allaanngilagut soorlu qatanngutigiit. Oqarfiginngikkaluarluta immitsinnut paasitittarpugut “tapersersorpakkit”. Tamanna naliittuuvoq, Gukki Nuka oqarpoq.