saassussineq

Qatanngutaasoq: Saassussisup toqoriaraluarpaa

Arnaq 27-nik ukiulik unnuami marlunngornerup pingasunngornerullu akornanni Nuummi peqqarniitsumik saassunneqartoq tupaqqasorujussuuvoq

kvinde overfaldet
Arnaq 27-inik ukiulik unnuaq pinerluuteqartumit suli paasineqanngitsumit aqqusinermi qiminneqariaraluarpoq

Arnamut qatanngutaasup ilaqutariit tamarmik ''tupaqqasorujussuusut'' Sermitsiaq.AG-mut nassuiaavoq.

Oqaluttuaq amiilaarnartoq
- Oqaluttuaq amiilaarnartuuvoq nunani allani kisimi pisartutut takorloortagaq. Saassussisup toqoriaraluarpaa, nukkami taama pineqarnera pillugu oqarpoq.

Angerlartilluni tassanngaannaq angummit kalaalerpaluttumit apummut uppisinneqarluni saassunneqariasaarpoq.

Taanna nikuinniarluni tamaviaarluni akiuuppoq, arlaleriarlunilu iluatsissimavaa.

Atuaruk: Arnaq saassunneqartoq - pinerluuteqartoq tigusarineqanngitsoq

- Angutip ilaquttatta arnartaasugut taamatut pisoqassagaluarpat qanoq iliussanersugut nassuiaattuaannarnikuuaatigut. Aap, imminut illersornissamut ilinniartariaqartugut isumaqartarpoq. Nukkama imminut illersornissamut ilitsersuutigineqartut ilaat eqqaasimallugu oqaluttuuppaanga, qatanngutaa oqaluttuarpoq.

Matup tungaanut akiuulluni pisoq
Taliatigut sakkortuumik tigugamiuk angutip iperartariaqalersimavaa, angerlarsimaffimmilu matuata eqqaanut kasuttorniarluni akiuulluni qanilliartorpoq, anaanaminit ikiorneqarniassagami.

- Aatsaat taamaalisoqarnerani anaanatta matu ammarmagu saassussisoq qimaavoq, qatanngutaasoq ilisimatitsivoq.

Arnaq 27-inik ukiulik qimeriarneqarnerminit ersarissunik ajoqusersimavoq, nakuuserfigineqarnermilu kinguninngua napparsimmaviliaanneqarpoq.

Nakorsanit politiinillu ikiortilluarneq
- Napparsimmavimmi sulisut aamma politiit sulilluaqaat tapersersuilluarlutillu, qatanngutaa nassuiaavoq, taassuma ilisimatitsissutigaa taanna kisimiilluni sinikkusunngilluinnarnini pissutigalugu unnuap ingerlanerani angerlarluni innariartortariaqarsimasoq.

Arnaq 27-nik ukiulik tarnip psykologimik oqaloqateqarnissaminut neqeroorfigineqarsimavoq, taamaalilluni tupannartumik misigisaqarnini suliariniassagamiuk.

Pinerluuteqartoq suli tigusarineqarsimanngitsoq politiit ilisimatitsipput.

Powered by Labrador CMS