Qasukkaanerit: Akiuussutissalertereersimasut mattusimasariaarutissapput
Inuit tamakkiisumik akiuussutissamik kapitereernikuusut angalasimallutik Nunatsinnut uteraangamik ulluni tallimani mattusimasarnissaat piumasaqaataajunnaassaaq. Naalakkersuisut taamatut ilisimatitsissuteqarput.
Inuit coronamut akiuussutissamik tamakkiisumik kapitissimasut angalasimallutik Kalaallit Nunaannut uteraangamik, juunip aallaqqaataa aallarnerfigalugu, misissorteqqinnissamik tungaanut ulluni tallimani mattusimasariaarutissapput.
Tassa misissuivik ammassappat inuit taakku avataaniit tikereernerminniit ulloq ataaseq qaangiutereeraangat misissortereersinnaassapput.
Tamakkiisumik akiuussutissamik kapitinnikuuneq qanoq paasineqassava?
Qasukkaanernik arlalinnik nassuiaateqarnermi taaguut "kapitinnikut" taaguusiunnagu "akiuussutissamik tamakkiisumik kapitinnikut" taaguutigitinneqarnera maluginiassallugu pingaaruteqarpoq. Tamanna isumaqarpoq, aalajangersakkanit taaneqartunit ilaatinneqarniaraani akiuussutissamut marloriarluni kapitittoqariissasoq, assersuutigalugu akiuussutissanik Moderna-mik imaluunniit Pfizer-imik kapitissimagaanni. Akiuussutissamik ataasiaannarluni kapitissimagaanni, taava malittarisassat nalinginnaasut malinneqassapput.
Pissarsiffik: Namminersorlutik Oqartussat
Tunillatsissimanngikkaanni mattusimanissamut piumasaqaat ingerlaannaq atorunnaassaaq. Malittarisassat qasukkarneqarsimasut aamma tamakkiisumik akiuussutissalertinneqarsimasunut, illoqarfinnit misissortiffigineqarsimasunit aamma mattusimanerup nalaani maannamut uninngaffigineqartartunit ingerlaqqittussanut atuutissapput.
Meeqqat marluk aqqanillillu akornanni ukiullit angalaqataasut ingiaqatigisamittuulli Covid-19-imut misiligummik tigusiffigineqarnissaminnut neqeroorfigineqassapput. Tamanna assersuutigalugu isumaqarpoq, angajoqqaat tamakkiisumik akiuussutissamik kapitereernikuullutik avataaniit angalasut taakkulu qitornaat angalaqataasut angalareernerminnit ullup tulliani misissortissinnaassapput - akiuussutissalertissimanngikkaluarunilluunniit.
Katersuunnissamut inerteqquteqarneq
Ulloq 1. juni 2021 aallarnerfigalugu inunnut Covid-19-imut akiuussutissamik tamakkiisumik kapitinnikunut katersuuttarnermut nalunaarummi inerteqqummut, nunanit allanit angalasunut inatsimmik atuutsitsiffiusumut, atuutsitsisoqarunnaassaaq. Tamanna isumaqarpoq inuit tamakkiisumik akiuussutissamik kapitinnikut Danmarkimeersut imaluunniit nunanit allaneersut assersuutaasumik nunatsinni angalasinnaanngussapput saqqummiussiartorlutik pikkorissaajartorlutilluunniit.
Inuit taakku ulluni 14-ini utaqqeqqaartariaqaratik peqataasinnaanngussapput. Tassa avataaniit tikereernerup aqaguani Covid-19-imut misissortittoqarsinnaassaaq kingornalu aaqqissussamut peqataalluni.
Namminersorlutik Oqartussanit erseqqissaassutigineqarpoq, qasukkaaneq inunnut akiuussutissamik tamakkiisumik kapitereernikunut taamaallaat atuutissasoq. Meeqqat akiuussutissamik kapitinnikuunngitsut taamaattorli akiuussutissamik kapitinnikunik ingiaqateqartut katersuunnermut nalunaarummi inerteqqummut ilaatinneqanngillat.
Meeraaqqat
1. juni 2021 aallarnerfigalugu meeqqat marluk inorlugit ukiullit tikinnermi Covid-19-imik tunillatsissimannginnerannut uppernarsaammik takutitsinissaq piumasaqaataajunnaassaaq. Taamatuttaaq tikinnermi Covid-19-imut misissortinnissaat piumasaqaataajunnaassaaq.
Inuit tamakkiisumik kapitinnikuunngitsut, siusinnerusukkulli Covid-19-imik tunillatsinnikut, qasukkaanernut taakkununnga ilanngunneqanngillat taamaalu malittarisassanik nalinginnaasunik malinnissallutik.
Nalunaarutit ulloq 21. Maj 2021 saqqummiunneqassapput, taakkulu Naalakkersuisut nittartagaatigut takuneqarsinnaapput.