Qasukkaaneq: Akiuussutissalertissimasut mattusimagallartarunnaassapput
Sisamanngorneq 1. juli aallarnerfigalugu nunatsinnut tikittut akiuussutissalertereersimasut mattusimagallartarunnaassapput. Nunatsinnut tikissinnaasut amerlineqassapput, aamma Islandimut silaannakkut aqqut ammarneqassallunil.
Innuttaasut tamakkiisumik akiuussutissalertissimasunut killilersuutit 1. julimiit ikinnerulissapput. Nunatta ammaakkiartorneranut alloriarneq tulleq Naalakkersuisunit nalunaarutigineqaqqammerpoq.
Innuttaasunut tamakkiisumik akiuussutissalertissimasunut killilersuutit qasukkarneqarneri isumaqarput angalasut tamakkiisumik akiuussutissalertissimasut tikinnerminni mattusimagallartarnerat atorunnaarsinneqassasoq, aamma tikinnerminni coronavirusimik tunillatsissimanersut pillugit misissuiffigineqartarunnaassasut.
- Tuniluunnersuup nalaani Kalaallit inuiaqatigiit nunarsuarmi inuiaqatigiit akornanni ikinnerpaamik killilersuinikuupput sapinngisamillu minnerpaamik inuiaqatigiinni pingaarutilimmik suliassaqarfinnut akornusiisimalluni. Avataaniit tikinnermiit killilersuisimanerup attatiinnarneqarsimaneranik tamanna annerpaamik pissutigineqarpoq, Namminersorlutik Oqartussat tusagassiorfinnut nalunaarutiminni aallaqqaasiipput.
Killilersuutit atuuttut akiuussutissalertissimasunut maanna qasukkarneqarput, pisariaqartitsisoqarneralu aallaavigalugu angalasut aamma amerlineqassallutik.
Angalasut suli qanermut assiaquteqartarnissaat atuutiinnarallassaaq, soorlu aamma angalasut tikinnissamut annerpaamik akunnerit 72 iluanni coronamut misissortissimanermut suli uppernarsaateqartassasut.
Nunatsinnut angalasut amerlissapput
Ullorsiutit julimiilerpata Kastrupimiit timmisartoq sapaatip akunneranut sisamariarluni nunatsinnut angalasalissaaq. Sapaatip akunneranullu nunatsinnut tikissinnaasut 1.000-inut amerlineqassallutik.
- Angalanermi ataatsimi inissat 27-vit pisortaqarfinnut inniminnerneqartassapput, tassani ilaapput napparsimasut, peqqinnissakkut sulisut aamma ilinniartut. Taassuma saniatigut Islandimiit sapaatip akunneranut angalanerit marluk tamarmik immikkut 30-nik ilaasoqarsinnaasut ammaavigineqassapput, Namminersorlutik Oqartussat tusagassiorfinnut nalunaaruteqarlutik allapput.
Aalajangersakkat nutaat corona allattoqarfianiit innersuussutigineqartut tunngavigivaat partiillu siuttuisa isumaqatigiillutik taakku akuersissutigineqarput. Aalajangersakkat nutaat 1. juulimiit 1. septembari 2021 tungaanut atuukkallassasut ilisimatitsissutigineqarpoq.
Tunu ammarnerussaaq
Tunumi angalasunut killilersuinerit qasukkarneri aamma malunniuteqassaaq. Nunatsinnut tikittut illoqarfinni annerusuni mattusimagallaqqaanngikkaluarlutik toqqaannartumik tunumukarsinnaalissapput.
- Kangia ammaqqinnerani illoqarfimmut tikiffigisassaq toqqaannaq tikinneqarsinnaalerpoq, tassanilu , tamakkiisumik akiuussuserneqarsimanngikkaanni ullut tallimat angerlarsimaffimmi mattusimagallartoqarsinnaalerpoq illoqarfimmilu misiliummik tigusiffigineqarsinnaalerpoq. Tamakkiisumik akiuussuserneqarsimagaanni mattusimagallarnissaq miliummillu tigusiffineqarnissaq pisariaqanngillat.