Qassiarsummi imeq imerneqarsinnaasoq saligaatsoq
Nukissiorfiit Qassiarsummi imeqarfimmik nutaamik pilersitsereernerata kingorna nunaqarfimmi innuttaasut imermik imerneqartussamik qalaasseqqaartarunnaassapput
Tamanna isumaqarpoq Qassiarsummi erngup imerneqartussap qalateqqaartarnissaanik inassut, ukiuni tallimani atorsimasoq, maanna atorunnaartoq, Nukissiorfiit tusagassiutinut nalunaarumminni taama ilisimatitsipput.
Imeqarfiliaq nutaaq
Nukissiorfiit Qassiarsummi imeqarfik nutaaq atulerpaat imermillu misissuinerit takutippaat, imeq maanna pitsaanerulersimasoq. Taamaammat Nunatta Nakorsaaneqarfiata aamma Pinngortitamut, Avatangiisinut Ilisimatusarnermullu Naalakkersuisoqarfiup Qassiarsummi imermik qalaasseqqaaqqusisarneq taamaatippaat.
Qassiarsunni imeqarfik nutaaq imeqarfinni assigiiaartunit, Nukissiorfiit ukiuni aggersuni tulleriaarlugit sanasartagassaanni, siullersaavoq. Ilimagineqarpoq imeqarfiit taama ittut nunaqarfinni amerlasuuni imermik imerneqartussamik pitsaanerulersitsissasut. Qassiarsummi imeqarfiup ikkussuunneqarnerani misilittakkat nunaqarfinni allani atorluarneqarumaartut, ilanngullugu ilisimatitsissutigineqarpoq.
- Nuannaarutigaarput Qassiarsunni misilittakkagut nunami maani nunaqarfinnut allanut ingerlateqqissinnaagatsigit, kisianni siullermik nuannaarutigaarput Qassiarsunni sullittakkatta maannakkut imermik imerneqartussamik ajornannginnerusumik pissarsisinnaalernerat, Qaqortumi Nukissiorfimmi immikkoortortaqarfimmi pisortaq, Lars Hoffmeyer oqarpoq.