Qasigiannguit: Kiisami sikumik aserorterisoqalerunarpoq - kisianni sapaatip-akunnerata tulliani

Sermitsiaq.AG-p sapaatip-akunnerata siuliani arfininngormat allaasereriigaatut, umiatsiaararsorlutik aalisartut imaani aalisarnissamut periarfissaannik Qasigiannguit eqqaanni siku akornusersuivoq. Aalisariutinut anginerusunut Qasigiannguanukarniartunut tamanna aamma atuuppoq.

Tamatuma Kommune Qeqertalimmi kommunalbestyrelsimut ilaasortaq, Inuit Ataqatigiinneersoq Kristian Jerimiassen, Issittumi Sakkutooqarfik Qasigiannguanukarluni illoqarfiup eqqaani sikumik aserorterinissaanik qinnuiginninneranik kinguneqarpoq, aalisarluni inuussutissarsiorneq taamaalilluni aallartinniassammat.

Sikumik aserorterisoqarniartoq

Kommune Qeqertalimmut akissummui Issittumi Sakkutooqarfik piffissami matumani allanik suliaqarneq pissutigalugu umiarsuarmik Qeqertarsuup Tunuaniittuuteqanngitsoq, Issittumi Sakkutooqarfik ilisimatitsivoq.

Sapaatip-akunnerata tulliani sumiiffimmi umiarsuaqalissallutik akissummi ilisimatitsipput, tassani sikumik aserorterisoqassalluni.

- Tamaattoq sikumik aserorterineq silap qanoq inneranik aalajangiiffigineqassapput, suliassaq taamaailluni eqqorneqarsinnaalluni, kiisalu sikup issussusaa apeqqutaassalluni, Issittumi Sakkutooqarfik akissuteqarpoq.

Najugaqartut ataqatigiissaarinissaannik kajumissaaneq

Issittumi Sakkutooqarfik inuiaqatigiinnit taperserneqarlutik sumiiffimmi oqartussanit ataqatigiissaarisoqarnissaanik pisariaqartitsisoqartoq, Issittumi Sakkutooqarfik akissummini naqissusiivoq. Assersuutigalugu kommunimi teknikikkut ingerlatsivimmit.

- Sumiiffimmi ataqatigiissaarisoqarnissaanik pisariaqartitsineq siornatigut sumiiffimmi assigiinngitsunik isummertoqartarsimaneranik pissuteqarpoq, Issittumi Sakkutooqarfik nassuiaateqarpoq.

Illersornissaqarfiup aammalu Issittumi Sakkutooqarfiup najukkani ikiorsiisarnera kalaallit inuiaqatigiivinut aningaasartuutaaneq ajorput.