Qasigiannguani tunillatsissimasut 50-it missaat
Nunatta nakorsaanerata Henrik L. Hansenip uppernarsarpaa Qasigiannguani tunillatsissimasut 50-it missaanniittut paasineqarsimasut.
Qasigiannguani coronavirusimik tunillaassuuttoqangaatsiarpoq.
Nunatta Nakorsaanerata Henrik L. Hansenip tamanna Sermitsiaq.AG-mut uppernarsarpaa.
- Qasigiannguani arlalinnik tunillatsittoqarsimasoq uppernarsarsinnaavara. Tunillatsissimasut paasisagut 50-it missaanniipput, Henrik L. Hansen Sermitsiaq.AG-mut oqarpoq.
Taassuma ilisimatitsissutigaa tunillatsissimasut amerlanerusut meeraasut.
Ataasinngorneq 29. november tunillatsissimasut paasineqarsimasut nutarterneqarneranni nunatta nakorsaaneqarfiata ilisimatitsissutigaa Qasiguannguani tunillatsissimasut sisamat paasineqarsimasut.
Tunillatsissimasunut qanillivallaarsimasunik misissuereernerup kingorna tunillatsissimasunik arlalinnik paasisaqartoqaqqippoq.
Henrik L. Hansen ilisimatitsivoq Qasigiannguani pisut pillugit piffissami qaninnermi nalunaaruteqaqqittoqarumaartoq.