Qarsoq Høegh-Damip siulittaasunngorniunnermi Aleqa ajugaaffigaa
Siumup Nuummi immikkoortoqarfiani siulittaasunngorniuttoqarpoq, Qarsoq Høegh-Dam qinersisoqarnerani ajugaagami siulittaasunngorpoq.
Siumut Nuummi siulittaasoq Hans Peter Poulsen sapaammi siulittaasunngorniunnermi ajorsarpoq.
Qarsoq Høegh-Dam siulittaasunngortoq, immikkoortortaqarfik tusagassiuutinut nalunaarummi ilisimatitsivoq. Siulittaasumik qinersinermi 18-init taaneqarpoq, Hans Peter Poulsen 11-nik qinerneqartoq.
Siumumi aamma Naalakkersuisuni siulittaasuusimasoq Aleqa Hammond aamma siulittaasunngorniunnermi qinigassanngortippoq. Hammond siulittaasunngornissaminut naammattunit qinerneqanngilaq, kisianni siulersuisunut ilaasortatut qinigaavoq.
Siumut Nuummi siulersuisut maanna ukuupput:
Siulittaasoq: Qarsoq Høegh-Dam
Siulittaasup tullia: Lars Jørgen Kleist
Aningaaserisoq: Kristina Mørch Kleist
Siulersuisunut ilaasortat: Aleqa Hammond, Najaaraq Møller, Jonna Trolle Qvist og Per Pilutaq Rosing-Petersen
Sinniisoq siulleq: Rasmine Hansen Sinniisup aappaa: Kirstine Davidsen
Qaammatini qulini siulittaasuusoq
Siulittaasuusimasoq Hans Peter Poulsen Siumut Nuummi qaammatini qulini siulittaasuuvoq.
Taassuma atorfik maajimi 2022-mi kommunalbestyrelsimut ilaasortamit Inga-Dora G. Markussenimit kingoraarpaa, taassuma Siumup siulersuisuunerini siulittaasup tulliunini aamma Kommuneqarfik Sermersuumi kommunalbestyrelsimut ilaasortaanini aallunniarlugit kissaateqarsimavoq.
Hans Peter Poulsen Inatsisartunut ilaasortaavoq.
Siulersuisuni ilaasortat nutaat akornanni politikkikkut ilisarisimaneqarluartumik ilaqarput - Per Rosing-Petersen, siornatigut Naleqqamit Inatsisartunut ilaasortaasimasoq kiisalu Inatsit tunngaviusussaq pillugu Isumaqatigiissitani ilaasortaasimasoq.