Qarsoq Høegh-Dam Inatsisartunit tunuarpoq
Qinigaasinnaanermut ataatsimiititaliap suliat qinigaasinnaanermut tunngasut aalajangiiffigineqartussat Inatsisartunut saqqummiutinnginnerani, ikiaroornartoq pillugu pineqaatissinneqarluni akiligassitsinnikuusimasoq, Qarsoq Høegh-Dam tunuarpoq.
OBS Aalajangerneq Inatsisartunit akuerineqartussaanera pillugu immikkoortoq ilanngunneqarpoq.
Inatsisartut ivertinneqarlutik ullumi ataatsimeerngaassapput, tamannali pitinnagu Qarsoq Høegh-Dam pillugu suliaq allamorujussuaq sanguvoq.
Siumut tunuliaqutaralugu 796-init taaneqarluni qinigaalluartoq, sulineq aallartinnaguluunniit tunuarpoq. Facebookimini taama ilisimatitsivoq.
Aalajangerneq Inatsisartut ivertinneqareerunik ullumi akuerissanerlugu pisortatigoortumik aalajangiiffigissavaat.
Sermitsiaq.AG 14. april allaaserinnippoq Siumumi qinigaanerpaat sisamaattut inissittoq siusinnerusukkut ikiaroornartoq pillugu inatsimmik unioqqutitsisimasutut eqqartuussivimmi sassartinneqarnikuusimasoq, taamatullu pineqaatissinneqarsimasoq akiligassitsilluni. Tamanna maanna kinguneqarpoq pisortatigoortumik inissinnginnermini maanna tunuarmat.
- Tamannalu demokrati aqqani amerlanerussutillit oqartussaasarnerat Isumaqataanngikkaluaraanniluunniit ataqqeqqissaarneqartuaannassaaq. Taamaattussaavoq, tamannalu ataqqilluinnarpara, Facebookimi allassimavoq.
- Politikkerneq inummut ataatsimut tunngaveqartussaanngilaq, politikki inuiaqatigiinnut pitsaanerpaamik tunngaviusumik anguniakkamut aallaaveqartuaannassaaq.
Taassuma erseqqissarpaa Siumut tunngavii tapersersorlugit isumaqatigilluinnarlugillu.
Aamma erseqqissaavoq maanna nipagiinnarunnarnani.
- Taamatulli oqareerlunga, arlaleriarlunga oqareernittuut maanna aamma oqaqqissaanga: Nipangernavianngilanga.
Politikkip anoraa malillugu tunuarnissamut aalajangiineq. Politikkerneq inummut ataatsimut tunngaveqartussaanngilaq,...
Slået op af Qarsoq Høegh-Dam - Isumasiorfik i Fredag den 23. april 2021