Oqaatsit

Qarasaasiat kalaallisut atuffassisinnaanngussapput

Mikroværkstedet Odensemiittoq qarasaasiat kalaallisut atuffassisalernissaannik inerisaavoq

Siunissami periarfissaalissaaq siutequtit qarasaasiamut ikkussinnarlugit kalaallisut allassimasut nipilimik qarasaasiamit atuffassissutigineqarnissaat

Kalaallisut allataq 2014-ip ingerlanerani qarasaasiamit nipilimmik atuarneqarsinnaanngussaaq. Tamanna pissaaq Mikroværkstedet Odensemiittoq qarasaasiat kalaallisut atuarsinnaanerannik programmiliaminik saqqummiussisinnaanngorpat. Atuisussatut pineqartut tassaapput tappiitsut aamma isigiarsuttut.

Qarasaasiat kalaallisut atuffassisinnaalernissaannik ineriartortitsinermut Velux-fonden aningaasaliissuteqarsimavoq. Inuppassuarnulli kalaallisut oqaatsit ilikkaruminaattarnerattulli kalaallisut oqalussinnaalernissaq qarasaasianut aamma ajornakusoorpoq.

Oqaatsivut takeqigamik
Kalaallisut oqaatsivut polysyntetiskisut taaneqartarput. Tassa oqaatsivut oqaatsinik arlariinit katitigaasaramik ilaatigut takisuunngorsinnaasarput.

- Qarasaasiat kalaallisut oqalussinnaalersinniarnerat unammilligassaavoq imaannaanngitsoq kalaallit oqaasii polysyntetiskiummata. Oqaatsimmi polysyntetiskiutillugit oqaatsit takisoorujussuanngorsinnaasarput oqaatsip tunngavianik aallartiffeqariarlutik naaneri allanngoraleraangamik isumaat allanngorsinnaasarlutik. Europamiut oqaasii assersuutissagaanni kalaallisut oqaaseq ataaseq oqaatsinit arlalinnit katitigaasinnaasarpoq, Mikroværkstedetimi nipinik suliaqartartoq Niels-Jørn Brostrøm Mikro Værkstedetip nittartagaani nassuiaavoq.

Assersuutitut taavaa oqaaseq ’tanngassimaarutigingaatsiarparput’ tassani takuneqarsinnaammat oqaatsit arlallit katikkaanni oqaatsip takisoorsuanngorsinnaanera.

Unammilligassaq tamanna Mikro Værkstedetip qaangeriarsimaavaa allatamiit nipimut malitassanik nutaanik sananikkut taakkulu qarasaasianut ikkunneqassapput. Pilersaarutit malillugit qarasaasiat kalaallisut atuffassissutissaat 2014-mi septemberimi misiligarneqarsinnaanngorsimassaaq.

Powered by Labrador CMS