Qarasaasiami inuinnaat naapittarfiini pissuserissaartoqarnissaa Nivi Olsenimit ujartorneqarpoq
Qarasaasiami inuinnaat naapittarfiini nakkarsaasarnerit amerlavallaartut Inatsisartuni ilaasortaq Nivi Olsen isumaqarpoq. Qarasaasiami inuinnaat naapittarfiini qanoq pissusilersornissamut immitsinnullu oqaloqatigiittarnitsinnut sammisalimmik paasititsiniaanermik suliaqartoqarnissaa siunnersuutigaa
Inuit amerlavallaat pissusilullutik quiassuaallutik ajorniartarput, uumissuillutilluunniit ilaatigullu qunusaarillutik pissusilertortarlutik.
Inatsisartuni ilaasortaq Nivi Olsen (D) taamatut isumaqarpoq. Taanna qarasaasiami inuinnaat naapittarfiini qanoq pissusilersornissamut sammisalimmik paasititsiniaanermik suliaqartoqalernissaa siunnersuutigaa.
Nivi Olsen Facebook aqqutigalugu ilaatigut akerartugaasareersimavoq, soorlu 'arnapalaatut maajunnartutut' allagarsinikuusimalluni.
Nittartakkatigut paasititsiniaaneq
- Neriuutingaara paasititsiniaaneq sakkortooq ajornartorsiummit ersarinnerulersitsissasoq, taamaalillutalu qarasaasiami inuinnaat naapittarfiini oqallittarnerput pitsaanerulersillugu, siunnersuummini ilaatigut allappoq.
Nittartakkatigut paasititsiniaasoqassasoq siunnersuutigaa.
- Imatut paasillugu aviisitigut nalunaaruteqartoqartaqassanngilaq, illoqarfinni plakat-eqassanngilaq, angerlarsimaffinnut agguaatassanik atuagaaqqanik peqassanngilaq. Taamaattorli Facebook-imut video-liornermut, titartakkanut, assilianut, allaaserisanullu nukiit atorneqassapput, Nivi Olsen siunnersuummini allappoq.
Siunnersuut Inatsisartunit siullermik oqallisigineqassaaq novembarip aqqarngani.