Qarasaasiakkut saassunneqarnissamik aarlerinartorsiorneq ilungersunartorujussuusoq
Taama oqarpoq Inu:it pisortaat Anders Hoffgaard, ajornartorsiutillu sammineqartariaqarnera ujartorlugu.
Kalaallit Nunaat qarasaasiatigut avataanit saassunneqarnissamut kajungerineqartorujussuusoq, Inu:it A/S-imi pisortaanerup oqaatigaa, taanna siornatigut Namminersorlutik Oqartussani Digitalinngorsaanermut Aqutsisoqarfimmi atorfeqarsimavoq.
Aviisi Sermitsiaq taama allappoq.
- Kalaallit Nunaanni qarasaasiakkut saassunneqarnissamik aarlerinartorsiorneq saassunneqartarnerlu Danmarkimit nunanillu allanit annertuneruvoq. Inuiaqatigiit ikittunnguuvugut, qarasaasianillu atuiffiulluarluta taamaattumillu eqqoruminartuulluta, Anders Hoffgaard oqarpoq.
- Tamanna qanoq ilillusi takusinnaagassiuk?
- Suliffeqarfinni ingerlatsivinnilu sullillugit nakkutiginniffigisatsinni tamanna takusinnaavarput. Avataanit iseriaraluartut amerlanersaat unitsinneqartarput atuisunillu malugineqartaratik. Takusinnaasarpavulli iseriaraluartartut. Namminersorlutik Oqartussat aamma Tusass taama misigisaqartarnersut apereriarsigik, Anders Hoffgaard oqarpoq, taassuma qularinnginnerarpaa, Sakkutuut Isertortumik Paasiniaasartuisa ataaniittup Center for Cybersikkerhedip tamanna tamakkiisumik nakkutigigaa.
- Kikkunuku taama saassussisartut?
Uppernarsarsinnaanngikkaluarlugu qularutiginngilara tamakku tassaasut Russit. Tamakkuninnga suliaqartut akornanni tamanna oqallisigisartorujussuuarput.