Qaqqat sisoorsinnaasut misissorneqarnissaannut aningaasaliisoqartoq
Qaqqat sisooratarsinnaasut misissoqqinneqarnissaannut aningaasanik danskit aningaasanut inatsisaanni immikkoortitsisoqarsimavoq
Nuugaatsiaq Illorsuillu tassaarsuarmit eqqorneqarmata misissueqqissaarneq nunami qaqqanik sisooratarsinnaasunik sumiissusersisussaq aallartinneqarsimavoq.
Siorna ukiup naanerani misissueqqissaarnerup takutippaa, nunami sumiiffinni allani qaqqat 18-it annertuumik imaluunniit annertoorsuarmik sisoornissamut ulorianartorsiorfiusut, taamaammallu qaqqat taakku erseqqinnerusumik misissorneqartariaqartut
Nunap assingi, silaannakkut assilisat, assit satellitsikkullu paasissutissat atorlugit misissueqqissaarttoqarsimavoq. Itisiliinerusumik misissuinerni nuna tikillugu misissuisoqarpoq, tamanna pingaartumik qulimiguullit sumiiffinni ulorianartorsiorfiusuni sivikitsunnguamik uninngatittarlugit ingerlanneqarpoq
Naalakkersuisut misissuinernut taakkununnga 9 millioner koruuninik aningaasaliisimapput, danskillu naalagaaffiat 15 millioner koruuninik tapeeqqullugu qinnuigineqarsimalluni.
Misissuinerit aasaq aallartinneqarsimapput, Klima,- energi- of forsyningsministeeriaqarfillu nammineq aningaasaatiminik 10 millioner koruuninik aningaasaliisimalluni. Tamanna Folketingimi aningaasaqarnermut ataatsimiititaliamut allakkiami takuneqarsinnaavoq.
Tamatuma saniatigut danskit aningaasanut inatsisaat aqqutigalugu aappaagu 5 millioner koruuninik aningaasaliisoqarnissaa qulakkeerneqarsimavoq.
Naalakkersuisut aappaagu 3 milloner koruuninik 2021-milu 6 millioner koruuninik tapiissuteqassapput.