Qaqqat innaasa sisoornissaat annertuumik ukunani aarlerinartoqartoq

Misissuinerup maannamut takutippaa sumiiffinni innuttaasut qimagutitinneqartariaqanngikkallartut, taamaattoq nunaqarfimmi Saqqami, Qeqertarsuup Nuussuullu akornaniittumi immikkut nakkutiginnittoqartariaqarpoq – pingaartumik ilaqutariinnut pingasunut.

Aarlerinaatilinnut uuttuutit pingasut

Qaqqat qaarsortaasa sisooratarsinnaanerannut misissuineq uuttuutinut pingasunut aggulunneqarsimavoq. Annertoorujussuarmik sisoortoqaratarsinnaaneranut aarlerinartorsiorfiusutut qaqqat pingasut tikkuarneqarput.

Kategori 1-tut, annertoorujussuarmik aarlerinartorsiorfiusutut taaneqartut sumiiffiit pingasut tikkuarneqartut tamarmik Karrat Kangerluanniipput, taamaammat Illorsuarniit Nuugaatsiamiillu innuttaasut qimagutitinneqarsimasut uternissartik naatsorsuutigissanngilaat.

Nunaqarfinni innuttaasut 140-t eqqorneqassapput

Kategori 2-mi, annertuumik aarlerinartorsiorfiusutut GEUS-imit taaneqartut sumiiffiit arfiniliusut, tamarmik Vaigatip Sullorsuaniipput. Tamanna isumaqarpoq nunaqarfik Saqqaq, 140-nik innuttaasoqartoq, aarlerinartorsiorfimmiittoq, qaqqammi qaarsortai sisuulerpata tassaarsuaqartoqassooq, nunaqarfillu eqqorneqarluni.

- Saqqami innuttaasut qaqqap innaasa sisoorfiusinnaanerat taakkulu kingunerisinnaasai pillugit kinguarsarneqanngitsumik ilisimatinneqarnissaat kaammattuutigineqarpoq. Tamanna pisariaqarpoq innuttaasut namminneerlutik ilisimalikkatillu naapertorlugit tamaani najugaqaannarnissaminnut aalajangersinnaanissaat eqqarsaatigalugu, tusagassiutinut nalunaarummi, Upalungaarsimanermi ataatsimiititaliap allassimasaani, atuarneqarsinnaavoq.

Mianersornissaq pillugu iliuutsit

- Mianersortumik periuseqarnissaq aallaavigalugu Saqqami innuttaasut agguaqatigiissillugu immap ulinnerpaaffiata tininnerpaaffiatalu qeqqata killinganit minnerpaamik 4 miiterinik qatsinnerusumi illuni unnuisarnissaat kaammattuutigineqarpoq, Upalungaarsimanermi ataatsimiititaliaq allappoq.

Tamanna isumaqarpoq pigisat marluk illullu pingasut aarlerinartorsiorfimmi inissisimasut. Misissuineq pillugu Upalungaarsimanermillu ataatsimiititaliap innersuussutai pillugit ippassaq ilisimatinneqarput. Ilaqutariit pineqartut maanna aalajangerniartussanngorpaat tassaarsuaqarnissaanut aarlerisaarineq attanneqaraluartoq iniminniiginnassanerlutik, qatsinnerusumut nuussanerlutik imaluunniit nunaqarfitsik qimallugu allamut nuussanerlutik.

Upalungaarsimanermut pilersaarutit

- Sullorsuup eqqaanut tunngatillugu angallannermut, kisarsimanissamut tammaarsimanermullu tunngatillugit suli mianersortumik periuseqarnissaq pisariaqarpoq. Tassaarsuaqarsinnaaneq kommunip upalungaarsimanissamut pilersaarutaanut ilanngunneqarnissaa aammalu innuttaasut aarlerinartoqarsinnaanera pillugit ilisimatinneqarnissaat pisariaqarpoq, Upalungaarsimanermi ataatsimiititaliaq, taassuma siulittaasua tassaalluni Avatangiisinut naalakkersuisoqarfimmi pisortaq, Mette Skarregaard Pedersen, erseqqissaavoq.

Erseqqissaassutigineqarpoq maannakkumuugallartoq nunaqarfimmi qaninnerusumi tullermi, Qeqertani, upalungaarsimanissamut piareersarnissamut pissutissaqanngitsoq.

Kategori 3-mi sumiiffiit qulingiluat

Kategori 3-mi, annertuumik aarlerinartorsiorfiusinnaasutut taaneqarsimasumi, qaqqat qaarsuisa sisoorsinnaanerannut aarlerinartoqarsinnaasutut nalilerneqartut qulingiluat ukuupput:

• Avanersuaq
• Sigguk
• Illorsuit
• Karrani sumiiffiit marluk
• Nuussuarmi sumiiffiit marluk
• Sisimiut
• Nuuk

GEUS-ip misissuineri nutaanik misissuinernik malitseqassapput, sumiiffiit tikillugit, imaani qaqqanilu misissuisoqassalluni.

Uippallertoqartariaqanngikkallarpoq

Oqartussat erseqqissaapput misissuinerit maanna uippallissutaassanngitsut.

- Innuttaasulli sapinngisamik ilisimatilluarnissaat pingaaruteqarpoq, Upalungaarsimanermi ataatsimiititaliami siulittaasoq, Mette Skarregaard Pedersen, erseqqissaavoq.