Qaqqap innaa sisuupiloortoq filmiliarineqarsimasoq
Ataasinngormat qaqqaq sisoormat qanittumiit isiginnaarneqarsimavoq. Sumiiffimmi upalungaarsimasut pisortaat innuttaasunut mianersoqqussutigaa, sisoorfiup eqqaani angalaarnissaq.
Nunaqarfiup Kangaamiut eqqaaniittumi Kangerlussuatsiami qaqqap sisoornera videokkut immiussaq Facebookikkut maannakkorpiaq isiginnaarneqarsinnaavoq.
Naja Lyberth Kreutzmannip immiussimasaa innuttaasorpassuit takusimavaat.
- Kangerlussuatsiami ulloq 06/08-20 tuperluta qaqqaq sisooriasaarpoq. Mianersoritsi, taanna saqqummiussamini 600-t sinnerlugit takuneqarsimasumi allappoq.
Naja Lyberth Kreutzmannip KNR-imut oqaluttuaraa, Kangerlussuatsiami tuperneranni qaqqaq sisoorsimasoq.
- Ujaqqat siullermik annikitsunnguit nakkakaasut, taava tassanngaannarujussuaq ujararujussuit qaqqakkut nakkakaaleriataarput, taanna innutaasunut kiffartuussivimmut oqarpoq.
- Nakkaaffimmukarniaqinasi
Pisimasoq tunngavigalugu Qeqqata Kommuniani upalungaarsimanermut pisortap inuit nakkaaffimmukarnissaannut mianersoqquai:
- Silaqassutsikkut malugisinaavara, sisoortoqarsimappat taava qaqqamit ujaqqat suli nakkaasinnaapput, imaluunniit ajornerusumik pisoqassappat sisoortoqaqqissinnaavoq, taamaammat inunnut kaammatuutigerusuppara nakkaaffimukannginnissaat, Qeqqata Kommuniani upalungaarsimanermut pisortaq Ole Kreutzmann Sermitsiaq.AG-mut oqarpoq.
2017-imi aasakkut nunaqarfimmi Nuugaatsiami alianaqisumik inuit sisamat inuunerannik naleqartumik qaqqaq sisoormat, Kalaallit Nunaanni qaqqat sisoorsinnaasut sumiissusersiorlugit misissuisoqarpoq.
Upalungaarsimanermut pisortap maanna misissorniarpaa, qaqqaq pineqartoq Namminersorlutik Oqartussat misissugaannut ilaanersoq.