tassaarsuaq
Qaqqap allap ilaa sisoorsinnaasoq
Qaqqaq ataasiinnaanngitsoq, kisianni qaqqat marluk Karrat Kangerluanni Nuugaatsiap eqqaani sisooriaannaapput
Nuugaatsiamut Illorsuarnullu ulorianartorsiortitsineq qaqqamit nakkaariaannarmit ataasiinnarmit pinngilaq.
Karrat Kangerluanni innat tamarmik ulorianartorsiorfiupput.
Sumiiffik aalajangeruminaatsoq
Geologit sumiiffimmik allamik naakkaariaannarmik aamma nassaarput, tamanna kikkunnit tamanit maannamut ilisimaneqarsimanngikkaluarpoq.
- Aallarniutigalugu sisoorfioriaannaat marluk toqqarneqarsimapput. Aappaa tusagassiuutineereerpoq, qaqqamili tassani ataaseqarpoq sisooriaannaasumik Nuugaatsimullu suli qaninnerusumiittumik, Bo Naamansen, Asiami pisortaq AG-mut oqarpoq.
Asiap GEUS-illu tamanna tamaat misissuiffigisimavaat.
- Qaammataasamit assilisatsigut takusinnaavarput sumiiffinni arlalinni minnerusumik sisoortoqarsimasoq, GEUS-imi pisortap tullia, Flemming Getreuer Christiansen, Sermitsiaq.AG-mut taama oqarpoq.
Tassani assimia aamma innaq tamarmi ulorianartorsiorfiusoq takuneqarsinnaavoq, GEUS-ilu aamma sisoorfinnik arlalinnik nalunaarsuisimavoq. Sumiiffiit ilaanni sisoornerit sioqqanut tuinnartarput, ilaallu Karrat Kangerluanut toqqaannartumik nakkaasarput.
Siulittuutit eqqornerusut
GEUS-ip naliliinermini qaqqaq siornatigut eqqartorneqareersoq pingaarnertut naliliiffigisimavaa. Tassanilu eqqortorujussuarnik siulittuuteqarsinnaapput.
Tassami juunip 17-anni tassaarsuaqarnerani pisumut assingusorujussuusut siulittuummi takutinneqarpoq.
- Sisoortoqarnerata kingorna mallit Nuugaatsiaq minutsit arfineq-pingasut qaangiunneranni Illorsuillu minutsit 13-it qaangiunneranni angussagaat naatsorsuutigissavarput. Tamannalu aamma takusinnaasimavarput, Flemming Getreuer Christiansen.
- Qaqqap sisoorsimasup annertussusaanit naatsorsussagutsigu, mallit aamma portussusaat assigisussaavaat.
Annertussusaa naatsorsoruminaattoq
Qaqqap taassuma ilisimaneqartumut tunngatillugu nakkaasinnaasup annertussusaa naatsorsoruminaatsinneqarpoq. Naak sanimut annertussusaa assiutigigaluarlugu, taassuma sisussagaluaruni qanoq 'issutiginera' siulittuutigiuminaappoq.
Tamanna pissutigalugu Upalungaarsimanermut Ataatsimiititaliap naliliinermini pisussat marluk nalilersorpaat. Ataaseq juunip 17-anni sisoortup affaata annertussusaa naatsorsuutigalugu. Aappaatalu sisoortup annertussuseqataanik sisoortoqarneranut ulunnganerata nalaanut naatsorsuusiorluni.
Pisussap aappaani Nuugaatsiaq ulorianartorsiorfimmiinneruvoq. Illorsuarni nunaqarfiup ilaa ulorianartorsiorfiussaaq.
AG-MI SAQQUMMERTUMI AAMMA ATUARUK: Naatsorsuutigissavarsi uteqqinngisaannassallusi.
Aviisi elektroniskiusoq uani ataani aamma pisiarineqarsinnaavoq: