Qaqqami ajutoorneq: Sakkortuumik isornartorsiuisoqareersoq peqqinnissaqarfimmi aqutsisut ullut 14-it qaangiuttut akissuteqarput
Qamuteralannik ajutoortoqarneranut atatillugu najoqqutassat nalinginnaasut malinneqarsimasut, Peqqinnissaqarfik isumaqarpoq. Pisortarli Erik Palop ajutoorfiusumiittup isornartorsiuineranut tunngasumik akissuteqanngilaq.
Nuup kangiani qaqqami angut qamuteralamminik ajutoormat, innuttaasut oqartussanit ikiorniarneqaraluarlutik ikiorneqannginnerannit sapaatip akunneri marluk qaangiutereerput. Erik Palo ajutoorfiusumiippoq. Politiit aamma peqqinnissaqarfiup akornanni attaveqatigiinnerup kipisoortarneranik, taanna misigisimavoq.
Isornartorsiuineq Sermitsiaq.AG-p oqartussaqarfinnut marlunnut saqqummiuppaa. Kalaallit Nunaanni Politiit pisortaat, Bjørn Tegner Bay, sukkasuumik akissuteqartoq, Peqqinnissaqarfimmi pisortaq Tina Amondsen, pisoq qanoq ingerlasimanersoq misissoqqissaarneqartinnagu akissuteqarumanngilaq. Maanna piareerpoq.
Pisortaq tusagassiorfimmit matuminnga apeqqutinik arlalinnik aperineqarpoq, taakku Erik Palop isornartorsiuineranut tunngapput. Taakku akissuteqarfiginngilaq. Illuanik peqqinnissaqarfiup isumaginninnera pillugu nassuiaavoq.
Najoqqutassat
Suliami pineqartumi inoqarfiunngitsumi inunnik ajoqusertoqartillugu isumaginninnissamut najoqqutassat nalinginnaasut malinneqarput, Tina Amondsen isumaqarpoq.
Sumiiffimmi ilisimaneqartumut ajutoortoqartillugu politiinut nalunaarutiginnittoqartartoq, paasissutissallu peqqinnissaqarfimmut ingerlateqqinneqartartut, taanna ilisimatitsivoq. Peqqinnissaqarfik aalajangersimasumik suliamik naliliisarpoq, ajoqusernerup annertussusaa malillugu qanoq iliuuseqartoqassanersoq, pissutsillu aalajangersimasut allat. Tamatuma kingorna pisariaqartitat malillugit suliaqartoqartarpoq.
Amondsenip oqarnera naapertorlugu, ajoqusertoq qamuteralannik Nuummut angallanneqarsinnaanngitsoq, politiit paasissutissiipput, taamaattumillu qulimiguulimmik aaneqartariaqartoq.
Taamatullu pisoqanngilaq.
Qulimiguulimmik assartuinissap aallartinneqannginnerani, ajoquserfiusumiittut sinneri angallassinissamik aaqqissuussinialertut peqqinnissaqarfik ilisimatinneqarsimasoq, pisortaq ilisimatitsivoq, tassanilu nakorsiartussaq angallammik angallanneqalersoq.
Apeqqutit akineqanngitsut
Ajutoortoq assut anniarpoq. Akunnernilu arlalinni nunamiissimagaluartoq, Erik Palop oqarnera naapertorlugu oqartussanit erseqqissumik nalunaaruteqartoqanngilaq. Taamaattumik nammineq allat najuuttut peqatigalugit iliuuseqarniarlutik aalajangerput.
Kalaallit Nunaanni Politiit ajutoornermut atatillugu peqqinnissaqarfimmit naliliinerit tunaartarineqartussallu pillugit ilisimatinneqanngillat, politiit pisortaat ilisimatitsivoq.
Peqqinnissaqarfik qanoq iliorsimanersoq – imaluunniit arlaannik iliuuseqarsimanersoq Erik Palo aamma ilisimasaqarsimanngilaq.
Peqqinnissaqarfik isornartorsiuinermut qanoq oqaasissaqarnersoq imaluunniit siunissami assingusumik pisoqassappat taamatut pisoqannginnissaanik pilersaaruteqarnersoq, Sermitsiaq.AG-p ilaatigut paaserusukkaluarpaa. Tusagassiorfik pisortamik oqaloqatiginnilluni apersuinissamik sulissuteqarpoq.