Skip to main content

Qaqortup eqqaani kabelip iluarsaanneqarnissaa kinguarteqqinneqartoq

Kujataani immap naqqatigut kabelip iluarsaanneqarnera aggustimi aallarteqqinneqassangatinneqarpoq. Sikorsuit maanna akornutaapput.

Umiarsuup iluarsaassisussap Horizon Enablerip Qaqortup eqqaani immap naqqatigut kabelip qilaliarfimmi iluarsaannissaa iluatsinngitsoorpaa. Kujataani maanna sikorsuaqarnerani iluarsaassinissaq ajornakusoorpoq, Tele-Postilu aalajangerpoq iluarsaassinissaq kinguarteqqinneqassasoq sikorsuaqareernissaata tungaanut.

- Kalaallit Nunaata Kujataani sikunik nalunaarutit paasinarsisippaat piffissami qanittumi sikoqarnera ajoraluartumik pitsanngornavianngitsoq. Tele-Postip umiarsuaq iluarsaassisussaq, sikunik alapernaarsuineq aammalu najukkami ilisimasallit isumasioqatigereerlugit taamaattumik aalajangerpoq, iluarsaassineq sikorsuaqareernissaanut kinguartinniarlugu, Tele-Post tusagassiutinut nalunaarummini allappoq.

Pisoq ajuusaarnartoq

Kujataani immap naqqatigut kabelip iluarsarnissaa Tele-Postip arlaleriarluni kinguartittareersimavaa. Qaqortup eqqaani silap unerisimasannginnera sikorsuaqartarneralu ajoqutaasarsimapput, iluarsaanissamik kinguartitsinermik kinguneqartarlutik.

- Qaqortup eqqaani suliaqarnerup maannakkut ingerlanneqarsinnaannginnera assorujussuaq uggornarpoq. Piffissami sivisuumi imaatigut kabelimik ajoquteqarnerit sullitatsinnut assut ajoqutaasimapput. Tamanna aammattaaq sulisutsinnut oqimaassimaqaaq, taakkumi sullitat pitsaasumik misigisaqarnissaat sapinngisartik tamaat anguniartuarpaat, pisortaaneq Kristian Reinert Davidsen oqarpoq.

Tele-Post ilisimatitsivoq sikorsuit tikiutinnginnerini iluarsaanissamut periarfissaqarlutik neriuutigisimagaluarlugu. Iluarsaassinerlu iluatsingajassimagaluarpoq, imaanili sarfaqarpallaarnera akornutaasimalluni.

Attaveqaatit akornuteqarsinnaapput

Sumiiffimmi sikorsuit qaqugu saavingutissanersut eqqoriaruminaapput. Tele-Postip taamaattumik naatsorsuutigaa iluarsaassineq aggustip aallartilaarnera ingerlateqqinneqarsinnaassasoq, sikorsuit saavereersimalerpata, Tele-Post ilisimatitsivoq.

Iluarsaassisoqarnissaata tungaanut kujataani internetimik atuisut attavinnik akornuteqarnermik misigisaqartarsinnaapput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER