Qaqortumi timmisartoqarfiliornissaq: Atorfiit inuttassarsiuunneqartut soqutigineqarluartut
Canadami entreprenøri Pennecon Heavy Civil sanaartortoralugu timmisartoqarfiliorneq aallartinneqarpat, najukkami sulisussat katillugit 23-t pisariaqartinneqassapput. Majoriaq Kujalliup Facebookikkut atorfinnik inuttassarsiuussilluni saqqummiunneqarsimasoq ingerlateqqissimavaa, innuttaasut soqutiginnilluartut takuneqarsinnaavoq.
Penneconip sisamanngornermi apriilip 21-ani Facebookikkut atorfinnik inuttassarsiuussinera Majoriaq Kujalliup ingerlateqqissimavaa, tamatumalu kingornatigut Majoriamit qinnuteqarniartut 27-30-t missaanniittut qinnuteqaamminnik, pikkorissarsimanermut uppernarsaamminnik uppernarsaatinillu allanik nassiussinissaannut ikiorneqarsimapput.
- Innuttaasut soqutiginnilluarput, taakku qinnuteqaataannut, pikkorissarsimanermut uppernarsaataanut qinnuteqaatiminnillu assiliinissaannut ikiorsimavagut. Taamaammat tallimanngornermi ataasinngornermilu qinnuteqarniartut ikiorlugit ulapissimavugut, tassa soqutiginnilluartoqarpoq, Majoriaq Kujallermi pisortaq Poul Jørgensen Sermitsiaq.AG-mut oqarpoq.
Sanaartornermi sulerusuttut biilinillu ingerlatsisutut sulerusuttut qinnuteqarnissaannut killiliunneqarsimavoq ulloq 25. april, ingeniøritulli pisortatullu qinnuteqarniartunut ulloq 4. maj killiliunneqarsimalluni. www.suli.gl-ikkut atorfiit suunersut misissorneqarsinnaapput. Majoriaqarfiit qarasaasianik kiisalu uppernarsaatissat pisariaqartinneqartut scannerneqarnissaannut ikiuussinnaapput.
Inutassarsiuussineq 7.000-eriarluni takuneqarsimasoq
- Saaffiginnittorpassuarsimanera nuannersumik tupaallaatigisimavarput. Qularutissaanngilaq timmisartorfiliornemi sulinissamut soqutiginnittoqarluarnera. Facebookikkut danskisut saqqummiussarput 7.000-eriarluni takuneqarsimavoq, 39-riarlunilu avitseqatigiiffiusimalluni, kalaallissulli aamma saqqummiussarput soqutigineqarluarsimavoq, Poul Jørgensen oqarpoq.
Majorami pisortap erseqqissaassutigaa, qinnuteqartoqarsimasinnaasoq Majoriamut attaveqarsimanngitsunik, taamaammallu qinnuteqarsimasut suli amerlanerusinnaasut.
Kalaallit Airports, Pennecon Heavy Civil Kommuni Kujallerlu pingasunngornermi apriilip 27-ani Campus Kujalliup inersuani nal. 18.30-21.00 innuttaasunik ataatsimiisitsissapput.
Pisariaqartitanut ikiorserneqarsinnaaneq
- Piginnaasat imaluunniit pikkorissarsimanermut uppernarsaatit qularutigigaanni Penneconimut allalluni suliffissanut allatsittoqarsinnaavoq, Pennecon sulerusulluinnartunik atorfinitsitserusummat, taamalu timmisartoqarfiliornermi sulinissamut piginnaasat nalilersortillugit. Majoriaq Kujalleq ilisimatitsivoq.
Teknikkimut tungasunut ikiorserneqarusukkaanni Nanortalimmi, Narsami Qaqortumilu Majoriamut saaffiginnittoqarsinnaavoq. Aamma Nuummi Pennecon 321252 aqqutigalugu sianerfigineqarsinnaavoq imaluunniit qaqortoq-airport@pennecon.com-imut allattoqarsinnaavoq.