Qaqortumi sulisitsisut: Timmisartoqarfiliorneq tamaat ataatsimut isigissavarput
Kalaallit Airports, Canadami entreprenørit Kommuni Kujallerlu Qaqortumi timmisartoqarfiliornissaq pillugu pingasunngornermi innuttaasunik ataatsimiisitsinissamut qaaqqusipput. Qaqortumi Sulisitsisut siulittaasuat timmisartoqarfiliorniarnermut atatillugu arlalinnik paasisaqarusuppoq.
Najugaqavissunik sulisoqarniarnersoq aamma suliassanik suliariumannittussarsiuussinissaq pillugit apeqqutit Qaqortumi timmisartoqarfiliorniarnermut atatillugu apeqqutit pingaaruteqarnerit ilagivaat.
Timmisartoqarfiliornissaq allartinneqangajalerpoq, tassungalu atatillugu Kalaallit Airports Domestic ullumi pingasunngornermi apriilip 27-ani innuttaasunik ataatsimiisitsinissamut qaaqqusivoq.
Erik J. Nørskovip, Qaqortumi Sulisitsisut siulittaasuata innuttaasunik ataatsimiisitsinissaq aallartitsinnagu Canadmi entreprenøri Pennecon Heavy Civil ataatsimeeqatiginiarpaa.
- Nuummi Ilulissanilu timmisartoqarfiliortoqarnera assigalugu ammasumik ingerlatsisoqarnissaa soorunami kissaatigaarput. Suliassanik sunik neqerooruteqarpat, najugaqavissunik sulisoqarnissamut qanoq siunertaqarpat aamma najukkami suliffeqarfiit suliassaannik sunik neqerooruteqarpat? Tamakku akissutissarserusuppakka, neriuutigaaralu ajunngitsunik akissutissarsiumaarlunga, Erik J. Nørskov Sermitsiaq.AG-mut oqarpoq.
Arlalinnik akissutissarsiumaarluni neriuutigigaa
Ilulissani Nuummilu timmisartoqarfiliornerit assigalugit Qaqortumi timmisartoqarfiliornissaq suliassarujussuuvoq. Qaarsoq tuusintinik arlalinnik tonsiusoq qaartinneqariarluni sequtserneqarlunilu nuunneqassaaq.
Innuttaasut ataatsimiisinneqarnerannut Pennecon Heavy Civilimeersunik peqataasoqassaaq. Kujataani Sulitsisut siulittaasuata ingerlatseqatigiiffiup qanoq oqaasissaqarnera pissanngatigaa.
- Maluginiarsimasara tassatuaavoq, aalajangersimasumik amerlassusilinnik maannakkorpiaq sulisussarsiortoqarnera. Taamaammat naatsorsuutigaara, qanoq iliuuseqartoqarniarnera pillugu itisilikkamik akissutissarsinissara, Qaqortumi Sulisitsisut siulittaasuat oqarpoq.
Najukkami entreprenørimit, 60° North Greenland ApS-imit neriuutigineqarpoq, Canadamiut entreprenøriata najukkami entreprenørinik atuinissaa, akileraarutit taamaalillutik kommunimut iluaqutaaniassammata.
- Najugaqavissut sulisorineqarlik
- Neriuutigaarput najukkami sulisut sapinngisamik atorneqassasut. Najugaqavissut sulisorineqanngippata, kommunip pisariaqartilluinnagaatut akileraarutitigut isertitaqartoqarpallaassanngilaq, 60° North Greenland ApS-imi pisortaaneq Rasmus Christian Rasmussen Sermitsiaq.AG-mut oqarpoq.
60° North Greenland ApS timmisartoqarfiliorniarnermit suli suliakkinneqarsimanngilaq, ingerlaavartumilli suliakkinneqartarnissaq neriuutigineqarpoq. Aqquserngit, mittarfik timmisartoqarfissalluunniit illutassai kisimik suliassaanngillat. Entreprenørit aamma kabelit kilometerinik arlalinnik takissusillit, illoqarfimmiit otte kilometerisut ungasitsigisumut kalillugit inissittussaavaat.
60° North Greenland ApS-imit neriuutigineqarpoq, timmisartoqarfissap 2025-mi naammassillugu suliarineqarnissaanut arlalinnik suliassaqartinneqarnissaq.
- Suliarersusutavut maannamut suli pissarsiarisimanngilagut, tamannalumi ajuusaarutigaarput. Akerlianilli sulisut ineqarfissaasa inissinneqarnissaannut init arlallit taakkununnga attartortissimavavut. Tamannatuaavorlu maannamut uagutsinnut suliakkiunneqarsimasoq. Taamaammat neriuutigaarput, amerlanerusunik suliakkinneqarnissarput, suliassat aallartinniassagatsigit, Rasmus Christian Rasmussen oqarpoq.
Innuttaasunik ataatsimiisitsineq pingasunngornermi nal. 18.30-21.00 Qaqortumiittumi Campus Kujalliup inersuaani ingerlanneqassaaq.