ineriartorneq
Qaqortumi sisoraatinik sangusaartarfik
Qaqortumi sisorartartut sangusaaqqittalersinnaapput. Ataartartut peqatigiiffiat illoqarfimmi majuartaatitaarusuppoq.
Ataarutinik sangusaartartut peqatigiiffiat, QSP, illoqarfiup sisorartarfianut aaqqiissutissamik pitsaanerusumik misiliiniarlerput.
- Sisoorfissamik marloriarlutik iluatitsisarsimangaluarput, taamatigulli kommunip ineriartortinneqaraneranut akornutaalaartuarsimapput. Sisoortarfik pilersinneqaraangat najugaqartunit soqutineqarluartartoq, QSP-minngaannersoq, Hans Vilhelm Rasmussen oqarpoq.
Atuaruk: Eqqartuussut: Majuartaateqarfik 600.000 koruuninik akiliissaaq
Piffimmi allami misiliiniartut
Tamanna pissutigalugu ataartartut peqatigiiffiata arsaattarfiup qulaaniittumut qaqqarsuarmut nunaminertarmik qinnuteqarsimapput.
- Aputaaruteriarpat sanaartugassanik suliaqartartunut nunagissaasoqarnissaa løjpemaskinamillu ingerlaarfigineqarsinnaalernissaa qanoq akeqassanersoq misissortinnissaa pilersaarutigaarput, Hans Vilhelm Rasmussen oqaluttuarpoq.
Aningaasanik ujaasisoqassaaq
Suliniummut aningaasat qanoq amerlatigisut atorneqassasut paasineqarpat, aningaasat atorneqartussat sumut aaneqarsinnaaneri ujartorneqassaaq. Aammalu majuartaasiortoqarnissaanut aaqqiissummik ujaasisoqassalluni.
Atuaruk: Majuartaateeraq kinguaattooqqasoq
- Illoqarfimmi majuartaateqarpoq angallanneqarsinnaasumik, taannali ukiut 20-it sinnerlugit atorneqarnikuunngilaq, taamaammat taanna misissortissavarput, Hans Vilhelm Rasmussen oqarpoq. Tassani aamma orpinnik oqquiffiliortoqarnissaa aasanerani piffiup kusanartinneqarnissaa eqqarsaatigalugu pilersaarutaasoq paasissutissiaraa.
Sisorartarfiliortoqarnissaanut nunaminertamik qinnuteqartoqarsimasoq, Kommuneq Kujallermi paasissutissiisarnermut pisortap, Jensine Berthelsenip, uppernarsarpaa.