Qaqortumi qatserisartut soraarartut
Qaqortumi qatserisartut affaat suliffimminnit soraarsimapput. Kommuni Kujalleq sisamanngormat unnukkut Facebookimini taamatut nalunaaruteqarpoq. Qatserisartut upalungaarsimanermut pisortassamik nutaamik toqqaasoqarsimaneranut akerliullutik soraarsimapput.
Qaqortumi upalungaarsimanermut pisortassamik nutaamik atorfinitsitsisoqarneranut atatillugu, qatserisartut qulit suliffimminnit ippassaq soraarsimapput. Taamatut qatserisartut aquttuat Jimmy Rødgaard Hansen Sermitsiaq.AG-mut oqaluttuarpoq.
Kommunenip Facebookikkut saqqummiussaa, innuttaasunit ernumassuteqartunit 50-init amerlanerusunit takuneqarlunilu nassuiaaqqusisunit oqaaseqarfigineqarsimavoq. Saqqummiussamili soraararnermut suna pissutaanersoq ilisimatitsissutigineqanngilaq.
Piukkunnarluartumik nutaamik pisortassaqaraluartoq
Jimmy Rødgaard Hansen oqaluttuarpoq, upalungaarsimanermut pissortassamik nutaamik toqqaasoqarsimanera, pisortat ippassaq nalunaarutigisaat, qatserisartunit naammagineqanngitsoq.
- Isumaqarsimagaluarpugut Miki Sikemsen atorfinitsinneqassasoq, taannami qatserisarfimmi ukiuni 20-ni sulisimavoq, Qaqortorlu ilisimallugu. Upalungaarsimanermut pisortaasimasumut tullersortitut aamma sulisimavoq, taanna oqarpoq.
Pisortalli allamik toqqaasimapput, tamannalu qatserisartut aqutsisuanit suleqataanillu akuersaarneqarsimanngilaq.
- Aallaqqaataaniit aallarteqqikkusunngilagut. Upalungaarsimanermut pisortanngortoq nutaaq illoqarfimmik qatserisarfimmillu ilisimasaqanngilaq, taamaammat uagut tassaavugut taassuminnga ilinniartitsisussat, taamaaliorusunngilagullu, taanna oqarpoq.
Sivikitsuinnarmik sulisartoq
Pisortassasut toqqarneqartup nutaap illoqarfimmik ilisimasaqannginnerata saniatigut, qatserisartut pineqartoq piviusorsiorpallaanngittartutut tusartarsimavaat, Sermitsiaq.AG-p paasissutissaatai naapertorlugit pisortatigoortumik suli taanna atorfinitsitsinneqarsimanngilaq.
- Qatserisartoqarnerup iluani suliffippassuaqartarsimavoq. Naluara sooq ilutsittarsimannginnerai. Ilinniartinnissaanulli piffissaq annertooq nukippassuillu atussagutsigit, aamma ukiut marluk pingasulluunniit qaangiuppata suliunnaaqqissappat, taava asuli ilinniartitsisimassaagut aallaqqaataaniillu aallarteqqilluta, Jimmy Rødgaard Hansen oqarpoq.
Taassuma oqaatigaa, qatserisartut piukkussaat Miki Sikemsen misilittagaqarluartoq atorfinitsinnagu, pisortat atorfinitsitsinermut atatillugu oqaloqateqarnerminni, angutip takorluukkaminik saqqummiisimanera pissutigalugu atorfinitsikkamikku kukkusumik pingaarnersiuisimasut.
-Taamatut iliorpugut, neriuutigigatsigu pisortat isummaminnik allannguillutik, Miki atorfimmut naleqqulluartoq tamattalu tapersersugarput atorfinitsissagaa, qatserisatut aqutsisuat naggasiivoq.
Upalungaarsimanermut pisortaagallartup Peter Mathiesenip pineqartoq suli oqaaseqarfigerusunngilaa, Facebookikkulli eqqissisaavoq.
- Qatserisartunik tunuartoqarneranik aallaaveqartumik Nanortalimmiit ikiortissanik tikisitsisoqarpoq. Taamaattumik Qaqortumi innuttaasut ernumassutissaqanngillat, taanna allappoq.