Qaqortumi Nuummilu Hans Egedep Nunatsinnut tikinnera malunnartinneqarpoq
Immikkut ittumik Qaqortumi saqqummersitsisoqarpoq, Nuummilu kaffillertoqarumaarpoq Hans Egedep oqaluffianilu tusarnaartitsisoqarumaarluni. Hans Egedep Nunatsinnut ajoqersuiartorluni tikinneraniit ukiut 300-t qaangiupput.
Hans Egedep Nunatsinnut tikinnera sumiiffinni assigiinngitsuni malunnartinniarneqarpoq.
- 1721-mi Hans Egedep tikinnera malunnartinneqartariaqarpoq. Kalaallit Nunaanni oqaluttuarisaanermi annertuumik pingaaruteqarmat, Qaqortumi katersugaasivimmi pisortaq, Dan Ullerup oqarpoq.
Hans Egedep Nunatsinnut tikinneraniit ukiut 300-t qaangiunneranut atatillugu politikerit malunnartitsisariaqartut, taanna isumaqarpoq. Hans Egede-mi kalaallit oqaasiisa tammatsaaliorneranut aamma pingaaruteqarmat taassumallu saniatigut Nunatsinni innuttaasut 95 procentiisa kristumiuuneranut peqqutaanerpaalluni.
- Inuiaqatigiinnut ullumikkut oqaluffik pingaaruteqartorujussuuvoq. Inuiattut ullorsiornermi tussiaqatigiittoqartarpoq naalagiartoqartarlunilu. Naalagiarnerit kalaallisut ingerlanneqarnerusarput illoqarfinni nunaqarfinnilu nammineq oqaluffeqartiterput aamma, oqaluttuarisaanermi ilisimatooq katersugaasivimmilu pisortaq, Dan Ullerup oqarpoq.
Nuummi malunnartitsineq
Nuummi ilagiit sinniisaasa Hans Egedep tikinnera Hans Egedellu Oqaluffia 50-iliinera malunnartinneqassaaq. Hans Egedep tikinneranut atatillugu arfininngornermi ualikkut kaffillertoqassaaq saqqummiisoqassallunilu. Oqaluffik Hans Egede-mi sapaammi nalunaaqutaq 19:00 tusarnaartitsisoqassaaq oqaluffiup 50-iliineranut atatillugu.
Tusarnaartitsinermi ilaatigut kukkilattariartoqassaq erinarsoqatigiinnillu tusarnaatitsisoqassalluni. Juaaka Lyberth, kukkilattariartartoq Chiho aamma Uummannamiillu erinarsoqatigiit ilaatigut sapaammi tusarnaartitsinermi tusarnaarneqarsinnaassapput.
Oqallitsitsisinnaasoq
Hans Egede pillugu immikkut saqqummersitsineq Qaqortup katersugaasiviani augustip qeqqata tungaanut takusarneqarsinnaapput. Tamannalu arlalinnit nuannarineqanngilaq.
Politiiniit katersugaasivimmi pisortaq attavigineqarpoq suut Hans Egede pillugu saqqummersinneqalernersut paasiniarlugit.
- Tamanna ajuusaarutigaara isumaqarama inuiaqatigiit akornanni Hans Egede pillugu avissaartuuterujussuartunik isumaqartoqanngitsoq. Politiilli attaviginninnerat takutippaa oqaluttuarisaaneq pillugu suli oqallinneq annertunerusariaqartoq, Dan Ullerup oqarpoq.
Hans Egedep eqqaassutissaa ukioq kingulleq aappaluttumik qalipanneqarpoq. Eqqaassutissallu soorlu Knud Rasmussenip eqqaassutissaa Sisimiuni aamma qalipanneqarluni.
Politikerit akisussaaffimmik tigusisariaqarput
Hans Egedep Nunatsinnut tikinneraniit ukiut 300-t Naalakkersuisut Kommuneqarfik Sermersoorlu assigiinngitsunik peqquteqarlutik malunnartinniarnagu aalajangernikuupput.
Politikerit toqqorterillutik iliuuseqarniartarnerat unitsissagaat Dan Ullerup-ip kaammattuutigaa. Kalaallit Nunaanni oqaluttuarisaanerup nutaanertaa ajunngitsortai ajortortaalu innuttaasut tusaasinnaasariaqaraat taanna isumaqarpoq.
- Asasakka politikerit - akisussaaffimmik tigusigitsi. Oqaluttuarisaanermi ajornartorsiutit isiginngitsuusaaginnarlugit qaangerneqarnavianngillat. Oqaluttuarisaanermi ilisimannilluarneq isummersorsinnaanerlu Kalaallit Nunaata siunissaanut pingaaruteqarpoq, Dan Ullerup oqarpoq.
Qaqortup katersugaasiviani immikkut saqqummersitsineq eqqumiitsulianik nunanit tamalaanit imaqassaaq, eqqumiitsuliortoq Lars Winther siuttoralugu.
Hans Egedep tikinneraniit ukiut 300-t qaangiunneranut atatillugu Dan Ullerup oqaluffitoqqami arfininngornermi nalunaaqutaq 12:30 aamma 16:30 oqalugiassaaq. Oqalugiarnerit danskisut ingerlanneqassapput kalaallisullu nutserisoqarumaarpoq. Pilersaarutit uani takukkit.