Qaqortumi mittarfissap 1500 meteriuinnarnissaa Naleqqamit piumasarineqartoq

Naleqqamit isumaqarput, Qaqortumi mittarfissap takissusissaa annikillineqarsinnaanngitsoq, Nuummi Ilulissanilu taamatut annikilliliisinnaaneq misissuiffigeqqaartinnagu. Partiimit kujataani mittarfissap 1199 meteriunissaa oqaatigineqartuaraluartoq.

Naleraq naalakkersuisooqatigisaminut aammaarluni isumaqataanngilaq. Aammaarlunilu mittarfiliornerit pillugit isumaqataanani. Nalunaarusiaq malillugu Qaqortumi mittarfissap naannerutinneqarnissaa Attaveqaatinullu Naalakkersuisup Naaja Nathanielsenip (IA) isumaqatigisaatut Qaqortumi mittarfissap naannerutinneqarnissaa Naleqqamit isumaqatigineqanngilaq.

2018-mi mittarfiliassat akuersissutigineqartussanngormata, taamanikkut Siumumi politikkikkut suleqatigisamik mittarfiit pillugit anguniagaannut akerliusumik mittarfiup naannerutinneqarnissaa partiimit siunnersuutigineqarsimavoq.

Taamanikkut Danmarki akuliummat Kielsenilu naalagaaffiup aningaasaleeqataanissaanik isumaqatigiissuteqarmat Naleraq naalakkersuisooqataajunnaarpoq.

Naaja Nathanielsenip 1199 meteriunissaa isumaqatigigaa

Qaqortumi mittarfissap inuiaqatigiit aningaasaqarnerannut kinguneqaatissai pillugi nalunaarusiami nutaami atuarneqarsinnaavoq, mittarfik naannerusoq aningaasaqarnermut pitsaanerpaamik aaqqiissutaasussaasoq.

IA-lli naalakkersuisooqatai Naleqqakkormiut allatu isumaqarput, naak ukiualuinnguit matuma siornatigut mittarfiup naannerusariaqarneranik oqaaseqartaraluarlutik.

- Mittarfissap 1199 meteriunissaa inuiaqatigiit aningaasaqarnerannut pitsaanerpaasoq erseqqissumik uppernarsaateqartinneqalernera nuannaarutigaarput, Napaattooq oqarpoq.

Imaanngilarli mittarfiup naannerutinneqarnissaa partiimit tapersersorneqartoq.

- Qaqortumi mittarfiup 1199 meterisut takisuuseqartinneqarnissaa isumatusaarnerpaajusoq oqaatigiuaannarsimavarput, qineqqusaarnermili neriorsuutigineqarsimasup akerlianik naannerutinneqassappat, Nuummi Ilulissanilu mittarfissat aamma qiviarneqartariaqarput, Jens Napaattooq Sermitsiaq.AG-mut oqarpoq.

- Aammaarlunimi Kujataa kingulliunneqarniarpasippoq, Napaattooq oqarpoq.

Aningaasat Nunatta Karsiani nassaarineqassasut

Mittarfik 1199 meterisut takitigisoq 3-400 millioner koruunit missaannik akikinnerussaaq. 1500 meterisut takitigisumik mittarfiliortoqassappat én milliard koruuninik nassaarniartoqartariaqarpoq.

Inuiaqatigiit aningaasaqarnerannut pitsaanerpaamik suliaqarnissaq pineqannginnami?

- Timmisartoqarfissanut allanut tunngatillugit akunnattuunngiivilluni 900 millioner koruuninik nassaartoqarsinnaasimavoq, Qaqortorlu neriorsuutigineqarsimasutut 1500 meterisut takitigisumik mittarfittaartinneqanngippat pitsaavallaassanngilaq.

Naalakkersuisut 900 millioner koruuninik mittarfinnut allanut atugassanik taarsigassarsiniarsinnaapput, Qaqortumili mittarfissaq Nunatta Karsianit aningaasalerneqartussaalluni, matumani kujataani timmisartoqarfissap imminut akilersinnaannginnera taamalu taarsigassarsinikkut aningasalersorneqarsinnaannginnera pissutigalugit.

Nalunaarusiaq pillugu IA oqaloqatigisimanngikkaat

1500 meterisut takitigisumik mittarfiliortoqarnissaa anguniarlugu suliassaqarfiit allat, soorlu ilinniartitaanerup, peqqinnissap isumaginnittoqarfiulluunniit annikillisaaffigineqarnissaa piareersimaffigivisigit?

- Naalakkersuisooqatigisavut suli oqaloqatiginngilagut, aningaasalli nassaariniarneqartussat pillugit isumaqatiginninniarnissamut piareeqqavugut.

Naapaattuup neriuutiginerarpaa, isumaqatiginninniarnerit aqqutigalugit Naalakkersuisooqatigiinni ataatsimut isummertoqarumaartoq. Tupigusuutiginerarpaalu Naaja Nathanielsenip nalunaarusiaq naalakkersuisooqatigiinni suli oqaluuserineqanngitsoq tusagassiorfitsigut nalunaaruteqarimanera.

- Naalakkersuisooqatigisavut suli oqaloqatiginnilagut. Naaja Nathanielseip nalunaarusiamut atatillugu isumanni tusagassiorfitsigut saqqummiutereerpaa, tamannali IA-p imaluunniit naalakkersuisup isumarineraat naluarput. Nalunaarusiaq misissorsimavarput, tamanna tunngavigalugu isumarput oqaatigalugu. Isumaqatiginninniarnermi aaqqiissutissanik nassaarsinnaanersugut paasinarsissaaq.

Powered by Labrador CMS