Qaqortumi mittarfiliornissamut selskabit tallimat qinnuteqarput

Kalaallit Airports Domestic A/S-ip Qaqortumi mittarfiliortitsinissamut neqeroorusiortitsilerpoq.

Tassani suliffeqarfiit piukkunnassuseqartut naliligaasimasut tassaapput:

• Pennecon Dexter Joint Venture
• MT Højgaard A/S
• J & K Petersen Contractors P/F
• Aarsleff-Ístak JV
• Munck Gruppen A/S

Tamanna Kalaallit Airports Domestic A/S-imit nalunaarutigineqarpoq.

Piffissaq malillugu sulisoqarpoq

1.500 meterimik mittarfiliorneq aasarumit aallartinneqassasoq naatsorsuutigineqarpoq.

- Qaqortumi mittarfiliornissamut neqeroorusiortitsineq piareerpoq, nuannaarutigaarpullu pilersaarut malillugu ingerlammat. Naatsorsuutigaarput suliarilluakkanik unammillertunillu mittarfiliornissamut neqeroorusiortoqassasoq, Qaqortumi mittarfik qilanaarineqartumut, Kalaallit Airportsimi pisortaq Peter Wistoft oqarpoq.

Ukiuni pingasuni sanaartornissaq

Suliffeqarfik mittarfiliortussaq kingusinnerpaamik maajimi isumaqatigiissuteqarfigineqarsimassasoq naatsorsuutigineqarpoq.

Mittarfiliorneq ukiuni pingasuni ingerlanneqassangatinneqarpoq piariissalluni ukiup 2023-p naanerani.