Qaqortoq
Qaqortumi mittarfiliornissamut aningaasaliisoqarnera nuannaarutigineqartoq
Qaqortup eqqaani suluusalinnut mittarfiliarineqartussatut pilersaaruteqarfigineqartup tungaanut aqqusinniornissaq akuersissutigineqaqqammerpoq
Qaqortumi mittarfiliortoqarnissaanut isumaqataasunut nuannersumik nutaarsiassaqarpoq.
Qaqortup eqqaani suluusalinnut mittarfiliarineqartussatut pilersaaruteqarfigineqartup tungaanut aqqusinniassap ukioq mannamiit suliarineqalernissaanut aningaasaliissuteqartoqarnissaanik Naalakkersuisut siunnersuutaat Inatsisartut Aningaasaqarnermut Akileraartarnermullu Ataatsimiitititaliaannit akuersissutigineqarsimanera Kommune Kujallermit tusagassiutinut nalunaarutigineqarpoq.
2018 mittarfeqalernissaa siunniunneqartoq
- Nunatta immikkoortuini allani mittarfeqarnikkut ineriartortitsimaneq assigalugu maani kujataani pineqarnissarput qanilliallammat qujanaqaaq, mannalu iluatsillugu Naalakkersuisut aamma Inatsisartut Aningaasaqarnermut Akileraartarnermullu Ataatsimiititaliaanni ilaasortat qutsavigalugillu nersualaarusuppakka, Kommune Kujallermi borgmesteri, Jørgen Wæver Johansen, oqarpoq.
Qaqortup eqqaani mittarfiliassatut pilersaaruteqarfigineqartoq nunap immikkoortuani ineriartortitsinermut iluaqutaalertussaasoq Jørgen Wæver Johansenip qularutiginnginnerarpaa, tamatumali saniatigut aqqusinniassap sananeqalernisssaa kujataani suliffissaqartitsiniarnermut ukiumi matumani iluaqutaalereersussaasoq aamma oqaatigalugu.
Inatsisartunit akuerineqassappat, Qaqortumi suluusalinnut mittarfeqalernissaa 2018-mi siunertarineqartoq peqqissutsimut attaveqarnermullu naalakkersuisoq Steen Lyngep ukioq kingulleq aggustimi oqaatigaa.