Skip to main content

Qaqortumi kivittaarineq

Kivittaarutinik oqimaatsunik Qaqortumi kivittaarisartut qivittaarisartunut Nuummeersunut Peter Sikemsenimullu Danmarkimeersumut unammissapput 

Qaqortumi nukittuut katersuutissapput - arfininngornermi maajip 25-anni Pilersuisoq kivittaarinermi unammiuaartitsilerpat. Taanna aaqqissuunneqarpoq Qatserisartut peqatigiiffiannit Qamitsi-mit piviusunngortinneqarlunilu Mik Sikemsen aamma Kommune Kujalleq suleqatigalugit.

Kivittaarisartut unammeriaatsini pingasuni squat, bænkpres aamma dødløft unammissapput. Nunani tamalaani unamminermi malittarisassat atorlugit kivittaarisartut Qaqortumeersut qulingiluat, Nuummeersut pingasut Danmarkimeersorlu Peter Sikemsen unammissapput.

Peter Sikemsen
Angusaqarluartarluni assammik arsartartooreerluni, tamatigut nukittorsarluni sungiusartarsimalluni, Peter Sikemsen ukiuni kingullerni kivittaarinermik sungiusartalersimavoq ukiunilu kingullerni marlunni Danmarkimi pissartanngorniunnerni peqataasarsimalluni, tamatumani veteran-ini 140 kiilut angullugit oqimaassusilinni angusarissaartarsimalluni.

Peter Sikemsen Qaqortumi unammiuaarnermi peqataasussani tusaamasaanersaavoq, rekorderalugit squat-imi 195 kg, bænkpres-imi 125 kg aamma dødløft-imi 230 kg, sungiusarluarsimallunilu Qaqortumukassaaq angerlalaarnissanilu qilanaaralugu.

Odensemit aallannginnerani Sermitsiaq.AG-p Peter Sikemsen oqaloqatigaa.

- Tamatigut sungiusartartorujussuuvunga. Assammik arsartaleqqaarlunga klubbini assigiinngitsuni unammisarfinni angummanniarlunga tamaviaartariaqartarsimaqaanga, tamatigullu nukittunerpaat ilagisarsimavakka, tamannalu tunngavik kivittaarisartutut ingerlateqqissimavara.

- Odensemi sungiusartarfimmi OBBC-mi sapaatip akunneranut pingasoriarlunga sakkortuumik sungiusartarpunga. Sungiusarnerit tamarmik akunnerit marluk missaannik sivisussuseqartarput. Taamaattumik sapaatip akunnerata ingerlanerani kiilorpassuit kivittarpakka.

- Soorunami aamma pitsaasumik inuuneqartariaqarpoq peqqinnartunillu naammattunillu nerisariaqarluni, taamaanngippat kivittaatit oqimaatsut sammineqarsinnaanngillat taamaattumik qasusuitsuujuarnissaq uannut inooriaasinngorsimavoq, Peter Sikemsen Sermitsiaq.AG-mut oqarpoq.
 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER