Qaqortumi "ikuallattumik qamisaaneq" ingerlaannartoq
Qaqortumi qatserisartut pisortaqarusupput tatigisinnaasaminnik aamma kommunimik pitsaanerusumik suleqateqarusupput, taamaanngippat amerlanerit suliffimminnit tunuassapput, qatserisartunit oqaatigineqarpoq.
Sapaatip akunnerata siuliani Qaqortumi qatserisarfik pisoqarfiusimaqaaq, tassa nammineq piumassutsiminnik qatserisartuusut arlallit tunuarniarlutik aalajangermata, kujataanili ajornartorsiutigineqartut suli atuupput.
Upalungaarsimasut pisortassaattut toqqarneqaraluartoq, qatserisartut pisortarerusunngisaat tunuarsimavoq, aamma qatserisartut pisortatut piumanrusaat Miki Sikemsen tunuarsimavoq.
Qatserisartut sapaatip akunnerani matumani pingasunngormat aqutsisut ataatsimeeqatigisimavaat, najukkamilu pisortassatut piukkunnaatillit ilaasa, upalungaarsimanermi pisortatut atorfimmik qinnuteqareersimasut maanna misissorneqarnissaat kissaatigalugu.
Aqutsisut suleqatigineqanngitsut
Kommunip nittartakkamigut nalunaarutigisimavaa, atorfik inuttassarsiuuteqqinneqassasoq, tamannalu isumalluarnanngitsoq, sulisut sinniissaat isumaqarpoq.
-Aqutsisunik ataatsimeeqateqarnitsit akissutissat utaqqivavut. Atorfiup inuttassarsiuuteqqinneqarniarnera ilisimasimanngilarput. Naatsorsuutigisimagaluarparput, ataatsimeeqatiginnginneranni aalajangiussaqarsimassanngitsut. Tamatuma suleqataarusuttoqannginnera takuteqqiinnarpaa, Ib Skærlund oqarpoq.
Taaassuma suleqataasalu upalungaarsimanermut pisortassatut kissaatigisamik saniatigut piumasarisimavaat, upalungaarsimanermut ataatsimiititaliami siulittaasoq maannakkutut borgmesteriussanngitsoq.
- Qatserisartuusugut tupigisimavarput, pisup matuma ingerlanera tamaat upalungaarsimanermut ataatsimiititaliap siulittaasuata uagutsinnut saaffiginnissimannginnera, sulisut sinniisaat oqarpoq.
- Isumarput malillugu, ajunaarnersuaqassangaluarpat tamatuma qanoq isumagineqarnissaa qinikkap ataatsip naluaa. Upalungaarsimanermummi pisortap tamatuma qanoq ingerlanneqarnissaa nalunngilaa, taanna oqarpoq.
Aqutsisunut imminnullu tatiginninnissaq pingaaruteqartoq
Qaterisartunit taamaammat piumasarineqarpoq, upalungaarsimanermut ataatsimiititaliami siulittaasoq siunissami upalungaarsimanermut pisortaassasoq.
Taamaattoqanngippat qatserisartut amerlanerit tunuartussaapput, Ib Skærlund oqarpoq.
Aqutsisoq qanoq iliornerat sooq akuliuffigissavisiuk. Suliassasi suliariinnarsinnaannginnassigit?
- Qaterisartut ataqatigiilluarnerat pissutaavoq. Nammineq piumassutsitsinnik qatserisartuuvugut, tamannali aamma inuunitsinnik naleqarsinnaavoq, taamaammat immitsinnut tatigeqatigiinnissarput pingaaruteqarpoq aamma qatserisartoqarfimmi qaffasissutsinut agguataarinnissimaneq eqqarsaatigalugu, Ib Skærlund oqarpoq.