Qaqortumi ikuallattumi takunnittut: Sakkortuvoq
Qaqortumi Kimmernani najugallit pingasunngonerup ullaavani qatserisartut kalerrisaarutaanit itertinneqarput. - Inuk ataaseq putsumik iioraasimamammat napparsimaviliaaneqarnikuuvoq, ullullu ingerlanerani angerlarnissaa naatsorsuutigineqarpoq, politiit taama tusagassiuutinut nalunaarumminni allapput.
Kimmernani inissiat ikuallassimasut ullaaq Qaqortumi innuttaasunut tusarliunneqarpoq. Ikuallattoqarnerani najugaqartut arlallit angerlarsimaffeeruteriasaarsimapput.
- Tupannarpoq. Inneq sakkornermik sukkasuumillu siaruarluni, Henrik Lyberth inissiat ikuallattut eqqaani najugalik oqarpoq.
Hendrik Lyberth Arnaq Lyberth-lu ikuallanneq aallartimmalli ullaaq nalunaaqutaq sisamat missaanili malinnaaffigaat.
- Inneq sakkortoorujussuuvoq. Siaruariartorami amilaarnartumik. Qamilersoriniarlugu sanianiittut ikummasertaramik, Hendrik Lyberth Sermitsiaq.AG-imut oqaluttuarpoq.
Inissiat najugaqarfigineqarsinnaajunnaarput
Ikuallattoqarnerani inneq inissianut pingasunut siaruarpoq, innerlu inissiap sisamaanut anngutileraluatoq, aappariit oqaluttuarput.
Inissiat katillugit arfinillit ikuallannermiit eqqugaasut najugaqarfigineqarsinnaajunnaartullu politiit paasissutissiissutigaat. Politiit qatserisartut peqatigalugit qanoq ikuallanneq aallartissimanersoq misissuleruttorpaat.
Maanna politikommissæriugallartoq, politiassistenti, Kunuk Jakobsen, Qaqortumi politiiniit ima oqaaseqarpoq:
- Sukkasuumik nalunaaruteqarneq pingaartuteqartorujussuuvoq oqartussallu akornanni ajunngitsumik suleqatigiittoqarnissaa aamma pingaaruteqarpoq. Inuit qimagussorneqarnissaat allanik ajoqusertoqannginniassammat sumiiffik isumannaarnissaa uagut politiiniit isumagaarput. Qatserisartullu ikuallannerup aqunneqarsinnaalernissaa isumagaat. Inuk ataaseq putsumik iioraasimammat napparsimavimmi katsorsarneqarpoq. Ajorluinnartumik pisoqarsimasinnaagaluarpoq qatserisartut taama sukkatigisumik sumiiffimmut apississimanngitsuuppata.
Politiit ikuallattoqaranik nalunaaqunaq 04.18 missaani nalunaarfigineqarput, qatserisartullu ikuallanneq nalunaaqutaq 07.30 missaani aqussinnaalerlugu. Ikuallanneq qulit missaani qaminneqartoq, politiit tusagassiuutinut nalunaarumminni allapput.
Uippallertoqanngilaq
Hendrik aamma Arnaq Lyberth unnuaq sininngingaajavipput. Ikuallattoqarnerani inneq inissiaanut anngutissagaluarpat qimagussuinissaminut piareersimaniarlutik. Ikuallattormi 50 meterit missaanik ungasissuseqarpoq. Kimmernat inissiaqarfiuvoq inissiallu sanileriiaallutik.
- Qujaqaagut ippassaanikkutulli anorersuannginnatta. Amiilaarnarsimassagaluaqaaq anorersuartumi ikuallattoqarsimasuuppat. Qujanartumik Kimmernarmiuusugut ataatsimoorrattaappugut. Ullaaralaaminngaanniit nipeqaavinnata isiginnaarparput ikuallattoq ataatsimoorluta. Misiginneqataanakulooqaaq, Arnaq Lyberth oqarpoq.
Ikuallattoqarnerani Kimmernat eqqaani uippallertoqarsimanngitsoq, Hendrik Lyberth oqaluttuarpoq.
- Eqqissisimarpasipput, kisianni qujanartoq ataatsip ikani najugallip igalaartik qiverlugu sinissimagamik. Uia igalaamik qaarpaluttumik tusaalluni pujorsunnimillu naammalerluni anillassimagami. Kasuttoqattaartitserlugillu eqqaamiuni. Tuparrassimaqaat, Hendrik Lyberth oqarpoq.
Aqqarngup missaani qatserisartut ikuallanneq qamivinniarlugu sumiiffinni assigiinngitsini qatserillattaarput.
Politiit suli ikuallanneq qanoq aallartissimanersoq misissorpaat sumilu aallartissimanersoq ilisimavaat. Inissiani najugaqartut INI suleqatigalugu inissianut allanut inissikkallarneqarput.