Qaqortumi eqqakkat amerlatsikkiartortut
Qaqortumi eqqakkanut aserorterivik ullut qulit matuma siorna aserorpoq. Tamannalu kingunerisaanik eqqakkanik maanna ikuallaasoqarsinnaanngilaq. - Eqqakkat qisuillu aserorterneqanngikkaangata ikuallakkuminaatisaqaat. Taamaamat ulluni makkunani ikuallaasoqanngilaq, Kommune Kujallermi ingerlatsinermi pisortaq nassuiaavoq.
Qaqortumi ikuallaavik aasaq manna ilungersunartorsiorpoq. Eqqakkanut aserorterivik juulip aallartinnerani aserorpoq, taamaalillunilu eqqakkat amerliartuinnarlutik.
- Ikuallaavik namminermini ajoquteqanngilaq, kisianni eqqakkanik aserorterivik massakkut ajoquteqarpoq. Eqqakkat aserorteriveqartinnata ikuallassinnaanngilagut, eqqakkat qisuillu aserorterneqanngitsut ikuallassiinaanerat ajornartorujussuusarami, Sem Ottosen Sermitsiaq.AG-imut oqarpoq.
Kingoraartissat inniminnerneqarput
Maskiinap kingoraartissai decembarimili inniminnerneqarput, aserorteriviup aserfallatsaaliornissaa eqqarsaatigalugu. Kingoraartissarli kingulleq juulip 13-ani tikinissaa naatsorsuutigineqarpoq.
- Eqqakkat maannakkuugallartoq containerinut katersorpagut. Aserorterivillu iluarsippat ikuallaavik nalinginnaasumik ingerlaqqilernissaa naatsorsuutigaarput. Naatsorsuutigaarput ullut 14-it qaangiuppata ikuallaavik atoqqissinnaalissagipput, Kommune Kujallermi ingerlatsinermi pisortaq Sem Ottosen oqarpoq.
Eqqakkanik aserorterivik angallattagaq Narsamiit tikinnissaa maanna aamma utaqqineqartoq, Sem Ottosen paasissutissiivoq. Taanna aserorteriviup iluarsarneqarnerani utaqqiisaasumik atorneqalernissaa taassuma naatsorsuutigaa.
- Ajoraluartumik eqqakkat amerliartorput. Qisuinnaanngillat aamma angerlarsimaffinniit eqqakkat aamma taakkua amerlatikkiartorput, Sem Ottosen oqarpoq.