Qaqortumi arnaq tammaaneqartoq toqungasoq nassaarineqarpoq
Arnaq inuusuttoq Qaqortumi arfininngormalli tammaaneqartoq, illoqarfiup ungasinngisaani nunami ajunaarsimasoq ataasinngornermi nassaarineqarpoq. Kalaallit Nunaanni Politiit ataasinngornermi unnukkut taama nalunaaruteqarput.
Arnaq inuusuttoq Qaqortumi arfininngormalli periarfeerunneqartoq toqusimasoq ataasinngornermi nassaarineqarpoq. Politiit tusagassiorfinnut taama nalunaaruteqarput.
Innuttaasut kajumissutsiminnik ippassaq ullumilu arnamik periarfeerunneqartumik ujaasisimapput.
- Kalaallit Nunaanni Politiit ataasinngornermi ualikkut nalunaarfigineqarput kajumissutsiminnik ujaasisut ilaata arnaq Qaqortumi periarfeerunneqartoq illoqarfiup ungasinngisaani asimi toqungasoq nassaarineqarsimasoq, politiit ilisimatitsipput.
Suna toqqutaasimanersoq politiinit maannakkorpiaq oqaatigineqarsinnaanngilaq.
Ilaqutaasut pinasuartumik ikiorserneqarnissaat maanna sulissutigineqarpoq, kajumissutsiminnillu ujaasisut nassaartuusut aamma ikiorserneqassallutik.
Politiit naapertorlugit innuttaasut suliami peqataalluarsimapput.
- Innuttaasut ujaasinermi ikiuussimasut politiinit qujaffigerusuppagut. Tuppallernarluinnarpoq takullugu innuttaasut imminnut ikioqatigiilluarsinnaaneri.
Diving and safety solutions Qaqortumiittoq aamma Arktisk Kommandop nakkutilliiartorluni angallataa Knud Rasmussen ujaaseqataasimammata politiinit aamma qujaffigineqartut, politiit tusagassiorfinnut allapput.