Qaqortumi politiit Qaqortup illoqarfiata ilaani Sivinganikasiani najugallit maannakkorpiaq ulorianartorsiortitsisoqarnera pissutigalugu mianersoqquaat.

Politiinit inuit sumiiffimmi najugallati qinnuigaat angerlarsimaannaqqullugit qanillanaveersaaqqullugillu.

Politiit Sermitsiaq.AG-mut ilisimatitsissutigaa, inut angerlarsimaffimmini aallaaserluni mattusimasoq pineqartoq. Inuk pineqartoq arlaannaannulluunniit qunusaarisimanngilaq. 

Pisoq ataasinngormalli allartippoq, politiit ualikkut marlunut pisoq pillugu nalunaarfigineqarmatali.

Politiit pisoq ajornerusumik kinguneqannginniassammat ippassarli tassani najuutilersimapput.

- Pissaanermik sapinngisamik annikinnerpaamik atuilluta eqqissisimasumik tamatumannga unitsitsinissarput kissaatigaarput, pingaaruteqarluinnarporli innuttaasut sumiiffimmut qanillinaveersaarnissaat, politiit tusagassiorfinnut nalunaarutaanni allassimavoq.