Qaqortoq: Mittarfissamut akigitinniarneqartoq missingersuutinit qaffasinnerusoq
Qaqortumi mittarfiliornissamut akigitinniarneqartoq missingersuutinit qaffasinnerujussuuvoq. Kalaallit Airportsip mittarfiup mittarfiullu illutassaata sananeqarnissaannut suliariumannittussaarsiuussinerminik taamaatitsiinnartariaqalerneranut tamanna pissutaavoq.
MALUGIUK: Nal. 11.43 nutarterneqartoq Kalaallit Airportsimit paasissutissat ilanngullugit, aaqq.
Kalaallit Airports akinik missingersuutit iluanniittunik sanaartornermik ingerlatsisut marluk naggataatigut isumaqatigiinniarfigineqarmata isumaqatigiissuteqarnissamik iluatsitsinngitsoorpoq. Ingerlatseqatigiiffik tusagassiuutitigut nalunaarummi paasissutissiivoq.
Kalaallit Airports paasissutissiivoq neqeroorutit missingersuutinit "qaffasinnerujussuusut".
Kalaallit Airports entreprenørit ilaannut marlunnut isumaqatiginninniarnerit nalaanni aammalu taakkua suleqatigalugit, suliassami sipaarutissanik, aningaasartuutit tamarmiusut ingerlatseqatigiiffiup aningaasaqarnikkut killissaasa iluanniititsilersinnaasunik, nassaarniarnissaq sulissutigaa. Tamatumunnga ingiaqatigitillugu suliassamut aningaasartuutaanerulertussanut matussutissanik Namminersorlutik Oqartussanit annertunerusumik aningaasalersuutissarsinissamut periarfissat ingerlatseqatigiiffiup oqaloqatigiissutigai, tusagassiuutitigut nalunaarummi oqaatigineqarpoq.
Kinguaattoorneq piviusunngortoq
- Kisiannili suliassami sipaarutissanik pisariaqartunik nassaarnissaq imaluunniit neqeroorummut akigititap appartinnissaa ajornartoq, ingerlatseqatigiiffiup paasivaa, taamatullu maannakkut neqeroorutit atorunnaarfissaat sioqqullugu aningaasalersuutissanik annertunerusunik neriorsuummik pissarsinissaq periarfissaqarsimanani. Tamatuma saniatigut paasineqarpoq 2020-imi ukiaanerani sanaartornermik suliaqarnerit aallartiffissaattut neqeroortitsinermut najoqqutassani naatsorsuutigineqartoq naammassineqarsinnaajunnaartoq.
Ingerlatseqatigiiffimmi aqutsisut, siunnersortitik peqatigalugit, aammalu Namminersorlutik Oqartussat isumasioqatigalugit, aappaagu nutaamik neqeroortitsinissaq siunertaralugu suliassamut nalilersueqqissapput, paasissutissiissutigineqarpoq.
- Qaqortumi mittarfissamut suliaqarnerit ukioq manna aallartinnissaat Kalaallit Airports Domestic A/S-ip qilanaarisorujussuusimavaa, taamaattumillu neqeroortitsinerup taamaatinnissaa pillugu aalajangiinissaq pisariaqarmat ajuusaarutigisorujussuullugu, siulersuisunut siulittaasoq Johannus Egholm Hansen oqarpoq.
- Ingerlatseqatigiiffimmi aqutsisut maannakkut Namminersorlutik Oqartussat isumasioqatigalugit, aningaasartuutissat appartinnissaat siunertaralugu, suliassamut allannguutaasinnaasut suussusersiniarlugit suliaqarneq ingerlateqqissavaat, taamatullu suliassamut aningaasalersuutissanik annertunerusunik aningaasaliinissaq pillugu Namminersorlutik Oqartussat oqaloqatigineqarnerat ingerlatseqatigiiffiup ingerlateqqissallugu, taamaalilluni Qaqortumi mittarfiliassap 2021-imi nutaamik neqeroortitsivigineqarsinnaanera aammalu 2024-imi naammassineqarnissaa, naatsorsuutigineqarsinnaassalluni, Johannus Egholm Hansen tusagassiuutitigut nalunaarummi naggasiivoq.